विपिनको ‘किङ’ लुक्स, ट्रोलको शिकार !
मंगलबार फिल्म ‘सेल्फी किङ’ले प्रदर्शन मिति तय गर्दै फिल्मको अफिसियल फर्स्टलुक पोस्टर रिलिज गर्यो । आगामी माघ २४ लाई प्रदर्शन मिति तय गरेर रिलिज गरिएको पोस्टरमा अभिनेता विपिन कार्की फिचर्ड छन् । भिन्न लुक्समा देखिएका यी भर्सटाइल अभिनेताको लुक्स भने गत महिना रिलिज हलिउड फिल्म ‘जोकर’सँग मिल्दोजुल्दो छ ।
विपिनको ‘किङ’ लुक्स रिलिज भएपश्चात सामाजिक सञ्जालमा ट्रोलको शिकार बनेको छ । सामाजिक सञ्जाल प्रयोगकर्ताले विपिनको लुक्सलाई ‘जोकर’सँग दाँजेका छन्, निर्माण टिमले हुबहु कपी गरेको आरोप पनि लगाएका छन् । त्यसो त पोस्टर बिगारेर विपिनलाई ‘जोकर’ नै बनाउन समेत भ्याएका छन् ।
फेसबुकमा आएका प्रतिक्रियाहरुमा जवाफ फर्काउँदै निर्देशक टर्न निर्माता दिनेश राउतले ‘जोकर’ नै हो लेखेका छन् । निर्माताको स्विकारोक्तीले फिल्म कहिँकतै ‘जोकर’ क्यारेक्टरसँगै मिल्न गएको भान हुन्छ । त्यसो त ‘जोकर’ रिलिजको समयसम्म ‘सेल्फी किङ’को छायाँकन नै सकिएको थियो, त्यसैले ‘जोकर’बाट प्रभावित भन्न भने मिलिहाल्ने ठाउँ छैन । तर कथावस्तु र क्यारेक्टरमाथीको मेल भने फिल्मको अन्य प्रचार सामाग्री सार्वजनिक पछि या फिल्म रिलिजपछि पत्ता लाग्नेछ ।
विपिन हांस्यकलाकारको भुमिकामा रहेको बताइएको यो फिल्मलाई विशाल सापकोटाले निर्देशन गरेका छन् भने अभिनयमा विपिनसँगै लक्ष्मी बर्देवा, अभय बराल, लोकमणी सापकोटा। सविन बाँस्तोला, भुवन चन्द, जीवन भट्टराइलाई देख्न सकिनेछ । दिनेश राउतसँगै सुभाष थापा निर्माता रहेको फिल्ममा सुशन प्रजापतीको छायाँकन छ । जीवन थापा सम्पादक छन् ।
