फ्लोरमा ‘प्रेमगीत ३’
प्रदीप खड्का स्टारर फिल्म ‘प्रेम गीत ३’ फ्लोरमा गएको छ । फिल्मको यसैसाता राजधानीमा मुहर्त गर्दै निर्माण टिमले छायाँकन थालेको हो । यो फिल्मबाट क्रिष्टिना गुरुङले अभिनेत्रीमा डेब्यू गर्दैछिन् ।
काठमाडौँको किर्तिपुर क्षेत्रमा एक महिना लगाएर निर्माण गरिएको सुटिङ स्टुडियोको सेटमा गत शुक्रबारबाट फिल्मको धमाधम छायाँकन गरिँदैछ । काठमाडौंको छायाँकन सम्पन्न हुनासाथ मनाङको रमणीय स्थलमा फिल्म खिचिने निर्माता निर्देशक सन्तोष सेनले जानकारी गराए । निर्माता सेन यो फिल्मबाट निर्देशक बन्दैछन् । फिल्म निर्देशनमा छेतेन गुरुङ र सेनको सहकार्य छ ।
‘प्रेमगीत ३’मा प्रदीप र क्रिस्टिनासँगै शिव श्रेष्ठ, सुनिल थापा, सन्तोष सेन, मनिष राउत, पुष्कर कार्की, प्रेम पुरी, कृष्टिना गुरुङ, क्रिजन गौतम, अनुभव रेग्मी, समृद्धी शाही ठकुरी, योगिसा खत्री, माओत्से गुरु, लक्ष्मी बर्देवा लगायतका कलाकारको अभिनय रहनेछ । प्रेम कथा बोल्ने फिल्मको कथा निर्देशक गुरुङ र मन्दीप गौतमले तयार पारेका हुन् ।
फिल्ममा कल्याण सिंह र एलिश कार्कीको संगीत रहनेछ । राजेश श्रेष्ठको छायाँकन रहने फिल्ममा हिमाल केसीको द्धन्द्ध निर्देशन, कविराज गहतराजको कोरियोग्राफी र बनिश शाह र भुपेन्द्र अधिकारीको सम्पादन रहनेछ ।
