‘लभ डायरीज’ भ्यालेन्टाइन रिलिज पक्का, पहिलोपटक फिल्ममा प्रिष्मा र प्रिन्सी
फिल्म ‘लभ डायरीज’ले आफ्नो प्रदर्शन मिति पक्का गरेको छ । यसअघि विभिन्न मिति घोषणाका बीच प्रदर्शनमा आउन नसकेको फिल्म अब भने नाम जस्तै प्रेमिल पर्व भ्यालेन्टाइनको छेकोमा प्रदर्शनमा आउने भएको हो ।
सुशिल श्रेष्ठ स्टारर फिल्म ‘आगामी फागुन २ (भ्यालेन्टाइन डे) मा दर्शकमाझ आउने निर्माण टिमले घोषणा गरेको छ । फिल्ममा समावेश हुने एक गीत छायाँकन सक्दै मिति घोषणा हुँदा ‘छम छम छम’ बोलको उक्त गीत राजधानीमा यसैसाता खिचियो । उक्त गीतमा अर्जुन पोखरेल शब्द र संगीत तथा दुर्गा खरेल, सुरेश लामा र कमला घिमिरेको स्वर छ ।
कोरियोग्राफर प्रविण सिंहले कलाकार सुशील, रुबिना थापा, विश्वजित रिमालसँगै प्रिष्मा/प्रिन्सी खतिवडा र कमला घिमिरेलाई स्टेप्स सिकाएका छन् । टिक-टक भाइरलहुँदै म्युजिक भिडियोमा व्यस्त प्रिष्मा/प्रिन्सीलाई पहिलोपटक फिल्मको गीतमा फिचर्ड गरिएको हो ।
सौरभ चौधरी निर्देशित लभस्टोरी फ्लेभरको ‘लभ डायरीज’मा सुशीलसँगै रुबिना र विश्वजितले मुख्य भूमिका निर्वाह गरेका छन् । फिल्ममा संजय लामाले क्यामेरा चलाउँदा लामो समयदेखि फिल्म सम्पादनमा सकृय साहिल खानले सह-निर्देशकको भुमिका निभाएका छन् । फिल्मको कथा, पटकथा मधु बास्तोलाको हो । सम्पादन मिलन श्रेष्ठको छ ।
