आर्यन स्टारर ‘जस्मिन’, फर्स्टलुक पोस्टर रिलिज
आर्यन अधिकारी स्टारर फिल्म ‘जस्मिन’को फर्स्टलुक पोस्टर रिलिज भएको छ । प्रेमकथामा बनेको फिल्मको सार्वजनिक पोस्टरमा आर्यन फिचर्ड छन् । पृष्ठभुमीमा अन्य कलाकार सांगितिक धुनमा देख्न सकिन्छ ।
एउटा संघर्षरत संगीतप्रेमीको जीवन यात्रामा आधारित फिल्मलाई शंकर कार्कीले निर्देशन गरेका हुन् । एक अन्जान पात्रले उक्त संगीतप्रेमीलाई कतिसम्म निस्वार्थ सहयोग गर्छ भन्ने फिल्मको केन्द्रिय द्वन्द्व रहेको निर्माण टिमले बताएको छ ।
यसअघि ‘रोमियो’ निर्देशन गरिसकेका निर्देशक कार्कीले भने, ”संगीतप्रेमीको जर्नी, एक अन्जान पात्रको निस्वार्थ सहयोग, साथीहरुको सम्बन्ध, पारिवारिक समस्या, समाजमा देखिने/सुनिने गम्भीर कुरालाई फिल्मले आत्मसाथ गरेको छ ।’
यो फिल्ममा आर्यनका अलावा अशिष्मा नकर्मी, के.के अधिकारी, सेविका प्याकुरेल, रुपा राना, अभय बराल, नविन लम्साल, एलिशा शर्मा, विशाल पहाडी, कृष्ण खनाल, मिना बानियाँ र बाल कलाकार श्रवणी थापाले अभिनय गरेका छन् ।
मेनका फिल्मस प्रालिको व्यानरमा निर्माण भएको फिल्ममा किरण घिमिरे (माइकल)को लेखन, अष्ट महर्जनको द्वन्द्व, मित्र डि गुरुङको सम्पादन र कोसिस क्षेत्री, कल्याण सिंह, एलिश कार्की, किरण घिमिरेको संगीत छ । फिल्मको ७५ प्रतिशत छायाँकन नेपालमा भइसक्दा बाँकी दृश्य चीनमा खिचिने बताइएको छ ।
