पुनः एकसाथ पूजा र आकाश, प्रेमकथामा ‘सम्झना बिर्सना’
पछिल्लो समय पर्दा र पर्दा बाहिर पनि धेरैले मन पराएको जोडी हो अभिनेता आकाश श्रेष्ठ र अभिनेत्री पूजा शर्माको जोडी । यो जोडीको फलोअर्स राम्रो छ धेरैले ‘रियल लाइफ’मा चाहन्छन् । पर्दामा आउँदा पनि जोडी जमेको पाइन्छ । पछिल्ला तीन फिल्ममा एकसाथ देखिएका आकाश पूजाको अब चौथो सहकार्य पक्का भएको छ ।
शुक्रबारबाट दुबैजना एकसाथ रहेको फिल्म ‘पोइ पर्यो काले’ प्रदर्शनमा आउँदैगर्दा शुक्रबार नै अर्को नयाँ फिल्मको मुर्हत भएको छ । फिल्मको नाम हो ‘सम्झना बिर्सना’ । यो फिल्ममा आकाश र पूजा लिड अभिनयमा रहनेछन् । भद्रकाली मन्दिरमा पूजाआजा गर्दै मुहर्त गरियो ।
प्रेमकथामा बन्ने फिल्म दार्जिलिङ, सिक्किम र नेपालको जीवन पद्दतिको प्रेमकथामा आधारित रहने बताइएको छ । फिल्मलाई निमेष प्रधानले निर्देशन गर्नेछन् । आदित्य प्रधान र रेविका प्रधानले निर्माण गर्ने फिल्ममा सुनिल थापा, शिशिर राणा र सिक्किमकी नयाँ कलाकार चाँदनी प्रधानको पनि मुख्य भूमिका रहनेछ ।
आदित्य फिल्मस् को ब्यानरमा निर्माण हुने ‘सम्झना बिर्सना’लाई शिव ढकालले खिच्नेछन् । यो फिल्म आउँदो कार्तिक २१ गतेबाट छायाँकनमा जाने बताइएको छ । यो फिल्ममा अनुबन्धित हुँदा पूजाले महंगो पारिश्रमिक लिएको कुराले निकै चर्चा पाएको थियो ।
