दर्शकमाझ ‘रातो टीका निधारमा’, पर्दामा साम्राज्ञीको स्टारडम परिक्षा
फिल्म ‘रातो टिका निधारमा’ दर्शकमाझ आएको छ । दशैँ लक्षित गरेर प्रदर्शनमा आएको फिल्म शुक्रबारबाट सिङगल स्कृन र मल्टिप्लेक्समा एकसाथ प्रदर्शनमा आएको हो । सुरुवाती दिनमा फिल्मले हलहरुमा राम्रो शोज पाएको छ ।
असोक शर्माको निर्माण निर्देशनमा बनेको फिल्ममा शर्मा पुत्र अंकित शर्मा र साम्राज्ञी राज्यलक्ष्मी शाह लिड अभिनयमा छन् । अंकितको लागी यो डेब्यू फिल्म हो । यस्तै रविन्द्र झा, बुद्धि तामाङ, लक्ष्मी गिरी, नीता ढुङ्गाना, खुश्बु खड्का, शिवहरी पौडेल लगायत यो फिल्ममा अभिनयमा छन् ।फिल्म दर्शकमाझ आएसँगै स्टार अभिनेत्रीको ट्याग पाएकी अभिनेत्री साम्राज्ञीलाई क्रेज र स्टारडम प्रमाणित गर्ने चुनौती पनि छ ।
युवाहरु विदेश पलायन हुदाँ समाजमा हुने समस्यालाई चित्रण गरेर बनाइएको फिल्म सदावहार हिट गीत ‘रातो टिका निधारमा’बाट क्रेडिट लिएर निर्माण गरिएको हो । पुरुषोत्तम प्रधानले खिचेको फिल्ममा मित्र डि. गुरुङको सम्पादन छ । यो सँगै अघिल्लो हप्ता प्रदर्शनमा आएको फिल्म ‘कबड्डी कबड्डी कबड्डी’ले सफलताका साथ दोश्रो हप्तामा आफ्नो प्रदर्शनलाई प्रवेश गराएको छ ।
