‘कबड्डी कबड्डी कबड्डी’ आक्रामक ओपनिङ
शुक्रबारबाट प्रदर्शनमा आएको फिल्म ‘कबड्डी कबड्डी कबड्डी’ले आक्रामक सुरवात गरेको छ । संविधान दिवसको अबसरमा परेको विदा लक्षित रिलिजलाई दर्शकले साथ दिएका छन् । सुरुवाती शोजदेखि नै फिल्म प्रदर्शनरत अधिकांश शोज हाउसफुल छन् ।
मल्टिप्लेक्समा एकछत्र राज गरेको फिल्मले शुक्रबार बिहानै देखि दर्शकको उत्साहप्रद साथ पाएको छ । पहिलो र दोश्रो सिजनले छोडेको कथा अनि ‘कबड्डी’सँग जोडिएको ब्राण्डले दर्शक हलमा तानेको छ । फिल्मको ओपनिङ अकुपेन्सी ७० प्रतिशत आसपास देखिएको छ । हेरिसकेका दर्शकबाट प्राप्त प्रतिक्रिया पनि सुखद छ ।
रामबाबु गुरुङ निर्देशित फिल्मको बिहिबार सांझ सम्पन्न प्रिमियरमा सेलिब्रेटीले सुखद प्रतिक्रिया दिएका थिए । निर्देशक गुरुङले आफ्नो सिद्धान्तलाई निरन्तरता दिएको बताएका छन् । फिल्ममा दयाहाङ राई, बिजय बराल, उपासना सिंह ठकुरी, कविता आले, बुद्धि तामाङ, पुष्कर गुरुङ लगायत लिड अभिनयमा छन् । फिल्मले पहिलो दिन १ करोड ग्रस ओपनिङ गर्ने अनुमान बिजनेस पण्डितहरुको छ । मणिराम पोखरेल यो फिल्मका कार्यकारी निर्माता हुन् ।
