पर्दामा ‘न यता न उता’, कस्तो रह्यो ओपनिङ डे ?
फ्राइडे रिलिज अन्तर्गत यो हप्ता शुक्रबारबाट दुई नेपाली फिल्म प्रदर्शनमा आएका छन् । कमेडी जनराको ‘न यता न उता’ रिलिज हुँदा सँगै प्रेमिल कथाको ‘रातो गलबन्दी’ रिलिज भएको छ ।
रिलिजपुर्ब बिहिबार साँझ राजधानीमा ‘न यता न उता’ले प्रिमियर शो गर्यो । प्रिमियरमा फिल्म हेर्ने दर्शकले सकारात्मक प्रतिक्रिया दिएको निर्माण टिम बताउँछ । फिल्म मल्टिप्लेक्स र सिंगल स्कृनमा एकसाथ प्रदर्शनमा आएको हो ।
बिशारत बस्नेत र मिराज रोशले निर्देशन गरेको फिल्ममा मिराज रोश, समिर दिक्षित, छुल्ठिम गुरुङ, बुद्धि तामाङ, रविन्द्र झा, सिल्सा जिरेल, राजाराम पौडेल, कमलमणी नेपाल, जीवन भट्टराई, किरण राई, नमिता घिसिङ, भिमा मैनाली, राजन खतिवडा, जयनन्द लामा लगायतको अभिनय छ ।
लण्डनबाट बिहे गर्न नेपाल फर्केका दुई अर्धबैशे पुरुषको जीवनमा आउने उतार चढावको कथा वाचन गर्ने ‘न यता न उता’ को ओपनिङ बिजनेस भने सुखद हुन सकेन । सिंगल स्कृन र मल्टिप्लेक्समा फिल्मको बिजनेस औसत रह्यो । निर्माण टिमले भने शुक्रबार जतिपनि फिल्म हेर्ने दर्शकले राम्रो भनेको दाबी गरेको छ ।
फिल्मको भविष्य शनिबारको बिजनेसले निर्धारण गर्नेछ । निर्माण टिमले सिङगल स्कृनमा भन्दा बढि अपेक्षा मल्टिप्लेक्सबाट गरेको छ ।
उता ‘रातो गलबन्दी’मा भने बुद्धि तामाङ, केकी अधिकारी र कोशिश क्षेत्री लिड अभिनयमा छन् । अनिश थापाको निर्देशन रहेको फिल्मको प्रचार प्रसार नपुग्दा ठुलो बिजनेसको अपेक्षा पनि कम छ ।
