फर्स्टलुक पोस्टरमा हेर्नुहोस्, अनुपबिक्रम स्टारर ‘पासवर्ड’
अनुपबिक्रम शाही स्टारर फिल्म ‘पासवर्ड’को फर्स्टलुक पोस्टर रिलिज गरिएको छ । निर्माण टिमले सार्वजनिक गरेको पोस्टरमा अनुप ‘एङ्ग्री मूड’मा देखिएका छन् भने निर्माता समेत रहेका अभिनेता विक्रम जोशीको ‘साइड लुक्स’ मात्र देखाइएको छ ।
आइतबार रिलिज पोस्टरबाट फिल्मभित्र अनुप र विक्रमबीच टकराब चल्ने भान हुन्छ । फिल्ममा अनुपले खलपात्रको भुमिका निभाएका छन् । कलाकारसँगै ‘पासवर्ड’ नामलाई परिभाषित गर्ने कोडिङ सिस्टमलाई पनि पोस्टरमा जोडिएको छ । टौवा क्रियशनको तर्फबाट शान थापा र विजय बस्यालले पोस्टर तयार गरेका हुन् ।
आगामी भदौ २७ (सेप्टेम्बर १३) बाट प्रदर्शनमा आउने फिल्ममा बलिउड अभिनेत्री सन्नि लियोनको आइटम गीत समावेश छ । उक्त गीत सार्वजनिक भइसक्दा सन्निको अभिनय समेत फिल्ममा रहेको प्रकारका गसिपले यो फिल्मसँग दर्शकको कौतुहलता समेत केहि हदमा बढेको छ ।
सम्राट बस्नेतको निर्देशनमा बनेको यो फिल्मका सबैजसो दृश्य युकेमा छायाँकन गरिएको छ । फिल्म ‘पासवर्ड’लाई बिक्रम जोशी, हिरल जोशी र अमित बस्नेतले निर्माण गरेका हुन् । एक्सन थ्रिलर जनराको फिल्ममा सौरभ लामाको छायाँकन छ भने अनुपबिक्रम र बिक्रम जोशीसँगै बुद्धि तामाङ, छुल्ठिम गुरुङ, बिक्रान्त बस्नेत, रविन्द्र झा, प्रविण खतिवडा, लिशा सुनार, परि राना लगायत लिड अभिनयमा छन् ।
२ दर्जनबढि फिल्ममा द्वन्द्व निर्देशन गरेका सम्राटको लागी यो फिल्म ठूलोपर्दाको डेब्यू निर्देशकिय फिल्म हो । फिल्म ‘पासवर्ड’मा अर्जुन जिसीको सम्पादन छ ।
