‘माछा माछा’ पोस्टर सार्वजनिक, रिलिज मिति घोषणा
फिल्म ‘माछा माछा’को प्रदर्शन मिति तय भएको छ । फर्स्टलुक पोस्टर रिलिज गर्दै निर्माण टिमले आगामी कार्तिक २९ लाई प्रदर्शन मिति तय गरेको हो ।
सुनिल गुरुङको लेखन निर्देशन रहेको यो फिल्ममा सौगात मल्ल मुख्य अभिनेता छन् । तीन गाउँले युवकहरुले शहरिया जीवन स्थापित गर्न लागिपरेको संघर्षको कथा बोल्ने फिल्ममा सौगातसँगै विजय बराल र अनोज पाण्डेको केन्द्रिय भूमिका छ ।
सार्वजनिक पोस्टरमा कलाकारहरु आफ्नो आफ्नो पात्र हुलियामा डुबेका छन् । अभिनेता माओत्से गुरुङलाई क्रिकेटको ब्याट र बल सहित देख्नसकिन्छ । पोस्टरमा अभिनेत्री नम्रता श्रेष्ठ पनि फिचर छिन् । यो फिल्ममा उल्लेखित कलाकारसँगै प्रवीण खतिवडा, पुस्कर गुरुङ, कमलमणि नेपाल, भोलाराज सापकोटा, सरिता गिरी, धुर्व कोइराला, बसन्त भट्ट लगायतका कलाकारको पनि अभिनय छ ।
सिनेमा आर्ट र नौमती इन्टरटेनमेन्टको व्यानरमा तयार यो फिल्ममा रामबाबु गुरुङ र दयाहाङ राईको लगानी छ । मणिराम पोखरेल कार्यकारी निर्माता रहेको यो फिल्मको सह-निर्मातामा ओमचन्द्र रौनियार र अर्जुन कार्की छन् ।
अनुपम शर्माको संगीत समावेश ‘माछामाछा’मा निमेष श्रेष्ठको सम्पादन छ भने शिवराम श्रेष्ठको छायाँकन र निर्देशक स्वयंम सुनिल गुरुङको कथा समावेश छ ।
