मोफसल प्रचारमा ‘सानो मन’
फिल्म ‘सानो मन’ यूनिट प्रचार प्रसारका लागि मोफसल यात्रामा निस्किएको छ । २७ असारबाट प्रदर्शनमा आउने यो फिल्म यूनिटले शूक्रबार चितवनका पत्रकारबीच अन्तरक्रिया गर्यो ।
अभिनेत्री शिल्पा मास्के, कलाकार सक्षमकृष्ण सुवेदी र निर्माता राजेन्द्र मानन्धरले ‘सानो मन’को बारेमा प्रकाश पारेका थिए । मास्केले यस फिल्ममा आफुले निकै मेहनत गरेको र दर्शकलाई मन पर्ने जिकिर गरिन् । पत्रकार भेटघाटमा नव अभिनेता सक्षम कृष्ण सुवेदी आफ्नो पहिलो फिल्म भए पनि निकै मेहेनत गरेको र यस चलचित्र बाट ठुलो आशा लिएको बताए ।
चितवनमा पत्रकार भेटघाट सकिए लगतै फिल्म यूनिट पोखरा पुग्यो त्यहाँ पनि फिल्मको बारेमा जानकारी गरायो । सुयोग गुरुङ्गको निर्देशनमा बनेको ‘सानो मन’मा आयुष्मान देशराज जोशी, शिल्पा मास्के, विशाल पहाडी, गौरी मल्ल, रश्मी भट्ट, शिशिर वाङ्देल, सक्षम कृष्ण सुवेदी, कृष्ण भक्त महर्जन, देव कुमार श्रेष्ठ लक्ष्मी भुषाल लगायतका कलाकारको अभिनय रहेको छ ।
यो फिल्म ओ.पि.जी फिल्मस, ए प्लस इन्टरटेन्मेन्ट र हाई टेक इन्टरटेन्मेन्टको संयुक्त ब्यानरमा निर्माण भएको हो । निर्माताहरू योगेश गुरुङ्ग, राजीव श्रेष्ठ, रमेश के. मित्तल र राजेन्द्र मानन्धर हुन् ।
