किन सर्यो ‘सानो मन’ रिलिज ?
आयुष्मान देशराज जोशी र शिल्पा मास्के स्टारर फिल्म ‘सानो मन’को रिलिज १ हप्ता धकेलिएको छ । यसअघि असार २० लाइ प्रदर्शन मिति तय गरिएको फिल्म अब असार २७ मा आउनेछ ।
प्राविधिक पाटोमा काम गर्न समय अपुग भएकोले रिलीज मिति सारिएको निर्माण पक्षले जनाएको छ । ‘हतारमा नराम्रो फिल्म रिलीज गर्नुभन्दा प्राविधिक सुधार गरी एक हप्ता ढिलो आउन लागेका हौँ’, निर्माता राजेन्द्र मानन्धरले बताए । सुयोग गुरुङको डेब्यू निर्देशनमा निर्माण भएको फिल्ममा आयुष्मान देशराज जोशी, शिल्पा मास्के, सक्षम सुवेदी, गौरी मल्ल, विशाल पहारी, शिशिर वाङदेल, रश्मी भट्टलगायतका कलाकारहरुको अभिनय छ ।
ओ.पि.जी फिल्मस्, ए प्लस इन्टरटेन्मेन्ट र हाई टेक इन्टरटेन्मेन्टको संयुक्त ब्यानरमा बनेको फिल्ममा सुयोग गुरुङ र मिलन श्रेष्ठको सम्पादन छ भने आलोक शुक्लाले छायांकन गरेका छन् ।काठमाडौं, भैरहवा, बैंकक लगायतका ठाउँहरुमा छायांकन भएको फिल्मलाई योगेश गुरुङ, राजीव श्रेष्ठ, रमेश के. मित्तल र राजेन्द्र मानन्धरले मिलेर निर्माण गरेका हुन् ।
