‘लप्पन छप्पन २’ मा अनुपको इन्ट्रि, सुटिङ पहिले रिलिज मिति घोषणा
फिल्म ‘लप्पन छप्पन’को सिक्वेल ‘लप्पन छप्पन २’ निर्माणको चर्चा लामो भइसक्दा बुधबार औपचारिक घोषणा सहित मुहर्त गरिएको छ । निर्माण टिमले राजधानीको कमलादी स्थित गणेश मन्दिरमा कलाकारको साथमा क्यामेरा पूजा गर्यो ।
मुकुन्द भट्टको निर्देशन रहने सिक्वेलको मुख्य कलाकारमा ‘लप्पन छप्पन’ मा देखिएकै अभिनेतात्रय दयाहाङ राई, सौगात मल्ल र अर्पण थापा दोहोरिँदा अभिनेत्री बर्षा शिवाकोटी बाहिरिने पक्का भएको छ । यो फिल्ममा अब नम्रता श्रेष्ठ र सुर्विना कार्की अभिनेत्रीमा रहनेछन् ।
यसैबीच फिल्मको कास्टिङ लाइनमा अभिनेता अनुपबिक्रम शाहीको इन्ट्रि भएको छ । उनले खलपात्रतर्फको मुख्य जिम्मेवारी सम्हाल्नेछन् । यसअघि नै महंगो पारिश्रमिकमा अनुप अनुबन्ध भएको चर्चा हुँदा निर्माण टिमले बुधबार मुहर्त कार्यक्रमका अनुपलाई सार्वजनिक गरेको हो ।
‘लप्पन छप्पन २’लाई पुरुषोत्तम प्रधानले छायाँकन गर्नेछन् भने यसको छायाँकन युरोप र अष्ट्रेलियामा हुनेछ । फिल्मका अन्य कलाकारमा देवु श्रेष्ठ, सिर्जना सिना, सन्नी ढकाल र फाजिल अहमद छन् ।
इपी एजुकेशन अष्ट्रेलिया र गोल्डेन हिल्स पिक्चर्स ब्यानरमा बन्ने फिल्मलाई चिज कुमार श्रेष्ठ र प्रजापती शिवाकोटी मिलेर निर्माण गर्नेछन् । यहि असार दोश्रो साताबाट फ्लोरमा जाने बताइएको फिल्मको प्रदर्शन मिति समेत सार्वजनिक गरिएको छ । निर्माण टिमले दिएको जानकारी अनुसार ‘लप्पन छप्पन २’ यहिबर्षको महाशिवरात्रीको अवसर पारेर फागुन ९ गते रिलिज हुनेछ ।
