‘लभ यू हमेशा’ पोस्टर सार्वजनिक, रिलिज मिति घोषणा
प्रेमकथा बोल्ने फिल्म ‘लभ यू हमेशा’को फस्टलुक पोस्टर रिलिज गरिएको छ । फिल्मको पोस्टर रिलिज गर्दै निर्माण टिमले प्रदर्शन मिति पनि तय गर्यो । आगामी भदौ ६ गते फिल्म रिलिज हुने छ ।
भाष्कर प्रधानले निर्देशन गरेको फिल्ममा यशराच गरज, ऋचा थापा, फिजा योन्जनको मुख्य भूमिका छ । उल्लेखित कलाकार नै फिल्मको सार्वजनिक पोस्टरमा फिचर्ड छन् ।
धर्मा क्रिएसनको ब्यानरमा यवन गुरुङको प्रस्तुति र मिलन गुरुङ सहनिर्माता रहेको फिल्ममा शिशिर राणा, गोपाल ढकाल ‘छन्दे’, पिटी योल्मा, प्रमिला राई, सल्देन तामाङ लगायतका कलाकारको पनि अभिनय छ । फिल्मलाई कालिङपोङ, सिलगुडी तथा काठमाण्डौमा खिचिएको छ ।
फिल्मको कथा निर्देशक भाष्करको नै हो । शिव ढकालले छायाँकन गरेका छन् भने एनबी महर्जनको द्वन्द्व रहँदा सम्पादन मिलन श्रेष्ठले गरेका छन् ।
