सन्निले कम्मर मर्काएको नेपाली फिल्म, ‘पासवर्ड’ रिलिज घोषणा
एबी इन्टरनेशनलको ब्यानरमा बनेको नेपाली फिल्म ‘पासवर्ड’को प्रदर्शन मिति तय भएको छ । निर्माण टिमले प्रेस वक्तव्य सार्वजनिक गर्दै आगामी भदौ२७ बाट फिल्म रिलिज हुने बताएको छ । यो फिल्ममा बलिउड अभिनेत्री (आइटम गर्ल) सन्नि लियोनले समेत एक गीतमा अभिनय गरेकी छिन् ।
सम्राट बस्नेतको निर्देशनमा बनेको फिल्मका सबैजसो दृश्य युकेमा छायाँकन गरिएको छ । फिल्मलाई बिक्रम जोशी, हिरल जोशी र अमित बस्नेतले निर्माण गरेका हुन् । एक्सन थ्रिलर जनराको फिल्ममा सौरभ लामाको छायाँकन छ भने बिक्रम जोशी (विक्की), अनुपबिक्रम शाहि, बुद्धि तामाङ, छुल्ठिम गुरुङ, बिक्रान्त बस्नेत, रविन्द्र झा, प्रविण खतिवडा, लिशा सुनार, परि राना लगायत लिड अभिनयमा छन् ।
सन्नि फिचर्ड गीत भने आउँदो जेठ २० गते रिलिज गरिनेछ । निर्देशक बस्नेतले ‘पासवर्ड’को कथा र स्कृनप्लेले गरेको माग अनुसार नै आफ्नो फिल्ममा सन्निले नृत्य गरेको बताउँछन् । २ दर्जनबढि फिल्ममा द्वन्द्व निर्देशन गरेका सम्राटको लागी यो फिल्म ठूलोपर्दाको डेब्यू निर्देशकिय फिल्म हो । फिल्म ‘पासवर्ड’मा अर्जुन जिसीको सम्पादन छ ।
