निर्माण पुर्व ‘प्रेमगीत ३’ रिलिज घोषणा, निर्देशनमा डेब्यू गर्दै निर्माता सन्तोष
हिट सिरिज ‘प्रेमगीत’को तेश्रो सिक्वेल निर्माणको लागी निर्माण टिम यतिबेला तयारीमा व्यस्त छ । स्कृप्टको काम भइरहँदा निर्माता सन्तोष सेनले फिल्म छायाँकनका लागी लोकेशन समेत तय गरिसकेका छन् । यो बीचमा फिल्मको प्रदर्शन मिति समेत घोषणा गरिएको छ ।
प्राप्त जानकारी अनुसार फिल्मको प्रदर्शन मिति (नयाँ बर्ष २०७७ को छेकोमा) यहि बर्षान्त अर्थात चैत्र २८ बाट प्रदर्शनमा आउने छ । निर्माता सेनले आशुसेन फिल्मस् को ब्यानरमा यसअघि निर्माण भएका ‘चंखे शंखे पंखे’, ‘प्रेम गीत’, ‘प्रेम गीत २’, ‘मेरी मामु’ मा भन्दा थप मेहनत र तयारीका साथ फिल्म निर्माण गर्ने भन्दै सक्दो राम्रो र दर्शकको मन जित्ने फिल्म दिनेमा आफ्नो ध्येय हुने बताए ।
यसैबीच यसअघि स्कृप्ट लेखक टर्न निर्देशक छेतेन गुरुङको एक्सन कट रहने खबर बाहिर आइरहँदा अब भने यो फिल्मबाट निर्देशनमा निर्माता सेनले समेत डेब्यू गर्ने भएका छन् । ‘प्रेमगीत ३’ छेतेन र सन्तोषको संयुक्त निर्देशनमा बन्ने मिडिया रिलिज मार्फत जानकारी गराइएको छ । फिल्मको थिम पोस्टर समेत रिलिज गरिएको छ, जहाँ लिड भुमिकामा रहने एक कलाकारलाई हातमा ‘बञ्चरो’ र काँधमा बन्दुक सहित देखाइएको छ ।
यो फिल्ममा लिड भुमिकामा को को रहने खुलाइएको छैन । संभवत प्रदिप खड्का लिड अभिनेताको रुपमा रहने पक्का हुँदा अभिनेत्री भने नयाँ रहनेछिन् । फिल्मको अन्य कास्ट एण्ड क्रूको बारेका जानकारी प्राप्त छैन ।
