पोस्टरमा हेर्नुहोस् हरर फिल्म ‘कठपुतली’
हरर जनराको फिल्म ‘कठपुतली’ प्रदर्शनमा लागि तयार भएको छ । प्रदर्शन मिति तय नभएको यस फिल्मको निर्माण टिमले बुधवार फस्टलुक पोस्टर सार्वजनिक गरेको छ । फिल्मको थिममा आधारित रहेर पोस्टर तयार पारिएको छ ।
कुनै कालखण्डमा एक राज्यमा शासन गर्ने राजाको दरबार भित्रको सेरोफेरोमा फिल्म आधारित रहेको लेखक तथा कार्यकारी निर्माता सम्पदा मल्लले जानकारी दिएकी छन् । बलात्कारपछि हत्या भएकी एक युवतीले लिने बदलाको कथा ‘कठपुतली’ रहेको उनको भनाई छ । उनका अनुसार, यो फिल्म हरर भएता पनि पूर्णतया मौलिक छ । अन्य हरर फिल्म भन्दा ‘कठपुतली’ भिन्न रहेको निर्माता पृथ्वी राना मगरले बताए । फिल्मको कथा भने पुर्णतः काल्पनिक भनिएको छ ।
यसलाई भिमसेन लामाले निर्देशन गरेका हुन् । लामाले यसअघि लघु चलचित्रबाट विभिन्न अन्तर्राष्ट्रिय फिल्म महोत्सवहरुमा अवार्ड जितिसकेका छन् । उनले ‘कठपुतली’ बाट फिचर चलचित्रमा डेब्यू गरेका हुन् । ‘यो चलचित्र हेर्दा नेपाली दर्शकले एकदमै नयाँ अनुभव गर्नेछन्,’ उनी भन्छन्, ‘हरर चलचित्र मेरो रोजाइको विषय हो र यो चलचित्र मेरो ड्रिम प्रोजेक्ट हो ।’
फिल्मको पोस्ट प्रोडक्सनको काम हाल लण्डनमा भइरहेको छ । यस फिल्ममा गौरी मल्ल, मिथिला शर्मा, कर्मा, शिल्पा माष्के, उषा रजक, सुवर्ण थापालगायतका कलाकारहरुको अभिनय छ । पृथ्वी राना प्रोडक्सनको ब्यानरमा बनेको फिल्मको निर्मातामा पृथ्वी राना मगर र ईश्वर राई छन् ।
