फ्लोरमा ‘हृदय भरीः मिस नेपाल बनिन् श्रद्धा
पल शाह र डेब्यू गर्ल श्रद्धा क्षेत्रीले जोडी बाँध्दै गरेको फिल्म ‘हृदय भरी’को छायाँकन सुरु भएको छ । राजधानीको धुम्बाराहीमा अवस्थित ‘दि भ्वाइस अफ नेपाल’को स्टुडियोमा सेट तयार गर्दै फिल्ममा समावेश हुने एक ब्युटी प्याजेमन्टको दृश्य क्यामेरा कैद गरेपछि फिल्म औपचारिक फ्लोरमा गयो ।
निर्देशक सुरज सुब्बा नाल्बोले उक्त ब्युटी प्याजेन्टको दृश्य टर्निङ प्वाइन्ट भन्दै फिल्मको महत्वपूर्ण दृश्य कैद गरी काम थालनी गरिएको बताए । प्राप्त तश्विर अनुसार उक्त दृश्य मिस नेपालको फिनालीको हो । जुन कुराले स्वभाविक रुपमा लिडिङ लेडी श्रद्धा फिल्ममा मिस नेपाल रहने भान दिन्छ ।
श्रद्धा र सह अभिनेत्री रेखा लिम्बुसँगै १५ बढि व्यवसायिक मोडलको साथमा शुक्रबार उक्त दृश्य खिचिएको थियो । फिल्ममा समावेश हुने उक्त कार्यक्रमको कोरियोग्राफी जयन सुब्बाले गरेकी छिन् । फिल्मका अन्य दृश्यहरु काठमाडौंसँगै धरानमा खिचिनेछ ।
निर्देशक नाल्बोकै कथामा तयार हुँदै गरेको ‘हृदयभरी’मा पल, श्रद्धा र रेखासँगै निर शाह, सुनिल थापा, काश बाबु, अनुराग कुवंर, निर्मल शर्मा, सलोन बस्नेत, मनोज केसी, कविता रेग्मी लगायत अभिनयमा रहनेछन् । फिल्ममा क्यामेरा मानकृष्ण महर्जनले चलाएका छन् ।
तश्विरः आर्यन बिमली
