मल केन्द्रित प्रचारमा ‘कागजपत्र’
महाशिवरात्रीको दिन काठमाडौंको सिटी सेन्टरबाट सुरु गरेको प्रचार प्रसार कार्यक्रमको निरन्तरता स्वरुप शनिबार काठमाडौंको चुच्चेपाटी स्थित के एल टावरमा दर्शकसँग प्रत्यक्ष भेटघाट कार्यक्रम आयोजना गरिएको थियो । अब रिलिजपुर्वका हरेक शनिबार बिदाको दिन पारी राजधानीमा सपिङ्ग मलहरुमा फिल्मको प्रचार गरिने निर्माण टिमले जनाएको छ ।
नक्कली बिहे गरेर अष्ट्रेलिया जान चाहनेहरुको कथामा निर्माण भएको फिल्ममा नाजिर हुसेन, शिल्पा मास्के, भोलाराज सापकोटा, सरिता गिरी, लोकेन्द्र लेखक, लक्ष्मी वर्देवा, जीवन भट्टराई, आरजेस रेग्मी लगायतका कलाकारको मुख्य भुमिका रहेको छ । फिल्मको यसअघि सार्वजनिक गीत मायाको संसार र ट्रेलरले दर्शकबाट राम्रो प्रतिक्रिया पाईरहँदा निर्माण टिम व्यापारलाई लिएर पनि आशावादी छ ।
इपी एजुकेशन अष्ट्रेलियाको प्रस्तुतीमा तयार फिल्ममा खिलेन्द्र तिम्सिना, मुकेश रेग्मी र प्रजापती सिवाकोटीको लगानी रहेको छ । फिल्ममा वसन्त सापकोटा र संगीत सापकोटाको संगीत, क्यासमिर डिक्शनको छायाँकन, निमेष श्रेष्ठको सम्पादन रहेको छ ।
