श्रीकृष्णको ‘चट्ट रुमाल’लाई ‘यात्रा’ले कति गर्यो न्याय ?
फिल्म ‘यात्रा’को दोश्रो गीत रिलिज भएको छ । यसअघि दशक पहिले रिलिज फिल्म ‘को आफ्नो’मा समावेश गीत ‘चट्ट रुमाल’को रिमेक भर्सन मंगलबार रिलिज गरियो । गीतमा मुख्य सबैजसो कलाकारले कम्मर मर्काएका छन् ।
कलरफुल बनाइएको गीतको भिडियोले भने लिरिक्सलाई अन्याय गरेको भान हुन्छ । ‘हाइ मेकिङ’ देखिँदा भिडियो हेर्ने दर्शकले गीतसँग त्यस्तो धेरै मेल खाएको भान गर्दैनन् । खासगरी दिवंगत अभिनेता श्रीकृष्ण श्रेष्ठ र निरुता सिंह फिचर निकै लोकप्रियता कमाएको सदाबहार हिट गीतको भिडियोमा पछिल्लो क्रममा भित्रिने डान्सिङ स्टेपलाई प्राथमिकता दिँदै मोडर्न बनाउने प्रयास गरिएको छ ।
विभिन्न ग्रुपको नाममा युट्युवमा अपलोड हुने डान्सिङ भिडियो हेरेजस्तो छनक यो गीतको भिडियोले दिन्छ । अर्कोतर्फ भिडियोमा कलाकारको भीड जम्मा पार्नुपर्ने आवश्यकता पनि कहिँ देखिँदैन । तर मुख्य कलाकारहरुको जम्मो टोली उतारेर थप फितलो बनाइएको छ । कोरियोग्राफी प्रविण सिंहले गरेका छन् ।
यसअघि ‘को आफ्नो’ फिल्मको उक्त गीतमा स्वर सम्भुजित बाँस्कोटा र साधना सरगमले भरेका थिए भने यो गीतको शब्द बाबुराम दाहालले लेखेका हुन् । सम्भुजितकै ओरिजिनल संगीत रहेको गीतको रिमेक भर्सनमा धर्मेन्द्र सेवान र मेलिना राइको स्वर छ ।
सम्राट शाक्यको निर्देशन रहेको ‘यात्रा’लाई चिजकुमार श्रेष्ठ र केशव भट्टराईले निर्माण गरेका हुन् । मुख्य लगानीकर्तामा सुशिल पोखरेल पनि छन् । फिल्ममा सलिनमान बनियाँ, सलोन बस्नेत, मल्लिका महत, प्रेक्षा बज्राचार्य, विशाल कटुवाल, प्रकाश अधिकारी, राजाराम पौडेल, रेयर राई लगायत लिड अभिनयमा छन् । नयाँ बर्ष २०७६को छेकोमा फिल्म रिलिज हुनेछ ।
ओरिजिनल गीतः
