भियतनाममा माया साट्दै प्रदिप र जसीताः ‘लभ स्टेशन’ रिलिज कन्फर्म
प्रदिप खड्का र जसीता गुरुङ स्टारर फिल्म ‘लभ स्टेशन’को रोमान्टिक गीत छायाँकन गर्न निर्माण टिम भियतनाम पुगेको छ । शिशिर खातीको कोरियोग्राफीमा हालै छायाँकन सकाइएको उक्त गीतमा प्रदीप र जसीताले माया साटेका छन् ।
यसअघि अमेरिका र भियतनाम युद्ध सम्बन्धि फिल्मसहित किङकङ, एनाकोण्डा जस्ता हलिउड फिल्म छायाँकन भएको भियतनामको लोकेशनमा ‘लभ स्टेशन’को ‘घाम जुन नै चाहिँदैन…’ बोलको गीत खिचिएको हो ।
गीतको भिडियो भ्यालेन्टाईनको अबसर पारेर २ फागुनमा रिलिज गरिने निर्माण टिमले बताएको छ । यो बीचमा गीत छायाँकनपछि नेपाल फिर्दै निर्माण टिमले अफिसियल रिलिज घोषणा गरेको छ । प्राप्त जानकारी अनुसार फिल्म आगामी चैत्र २२ बाट दर्शकमाझ आउँदैछ ।
प्रस्तुतकर्ता एवमं वितरक गोविन्द शाहीले ‘लभ स्टेशन’को रिलिज मिति घोषणा गर्दै यसलाई २२ चैतमा रिलिज गर्नु लागेको बताए । कारणबारे उनले भने,‘मैले वितरण गर्न लागेका फिल्महरु ‘क्याप्टेन’ १७ फागुनमा, ‘साइँली’ १५ चैतमा र ‘ए मेरो हजुर ३’ को रिलिज २९ चैतमा गरिने भएपछि यो फिल्मको प्रदर्शन व्यवस्थित गर्न पनि २२ चैत रोजेको हुँ ।’
उज्ज्वल घिमिरेले निर्देशन गरेको फिल्ममा प्रदीप र जसीतासँगै रमेश बुढाथोकी, प्रकाश शाह, रेशु भट्टराई, बिनोद कुमार पौड्याल, प्रिया रिजाल, सरु बिष्ट, रवी डंगोल, दिनेश काफ्ले, कालु रानासहितको अभिनय छ । आलोक शुक्लाले क्यामेरा चलाएका छन् ।
