अनागतमा अर्पण र प्रियंकाबीचको द्वन्द्व !
साढे दुई बर्ष पहिले जस्तो निर्माण भएको फिल्म ‘अनागत’ अब भने माघ ११ बाट प्रदर्शनको लागी तयार छ । साम्तेन भुटियाको निर्देशनमा बनेको फिल्ममा प्रियंका कार्की र अर्पण थापा लिड अभिनयमा छन् ।
प्रदर्शनको मिति नजिक हुँदा निर्माण टिमले राजधानीमा एक कार्यक्रम गर्दै फिल्मको कथावस्तुको बारेमा प्रष्ट्यायो । अभिनेता अर्पणले आफ्नो फिल्मी करियरमै काम सकिसकेपछि पनि सबैभन्दा लामो समयसँग मन र मष्तिष्कबाट छुटिन नसकेको क्यारेक्टर अनागतको भन्दै पृथक स्वाद दर्शकले भैट्ने बताए ।
निर्देशक भुटियाले फिल्म एक परिवारको पति पत्निबीचको मानसिक द्वन्द्वको कथा रहेको खुलाए । सस्पेन्स थ्रिलर जनराको फिल्मबारे अभिनेत्री प्रियंकाले परिवारका सदस्यबीच स्वत स्फुर्त रुपमा निम्तिने द्वन्द्व तथा सम्बन्धमा आउने दरारको वरी परी फिल्म घुमेको बोलिन् । अर्पण र प्रियंकाले फिल्ममा पति पत्निको भुमिका निभाएका छन् ।
सिसन बानियाँले खिचेको फिल्ममा प्रियंका र अर्पणसँगै प्रविण खतिडा, रोसिन सुवेदी, अरुण रेग्मी, सम्राट थापा, अनु शाह लगायत मुख्य अभिनयमा छन् । फिल्मलाई निर्देशक भुटियाले नै सम्पादन गरेका छन् । चन्द्र कुमार झाको कथा समावेश छ ।
