सुटिङ नजाँदै अर्को घोषणा, अब भदौमा अनमोलको ‘ब्याचलर बन्टी’
स्टार अभिनेता अनमोल केसी यतिबेला फिल्म ‘ए मेरो हजुर २’ को अन्तिङ छायाँकनमा व्यस्त छन् । यो बीचमा छिट्टै नै उनि होम प्रोडक्सनको फिल्म ‘क्याप्टेन’को प्रचार प्रसारमा व्यस्त हुनेछन् । यी दुई फिल्म फ्लोरमा नजाँदै उनको ‘ब्याचलर बन्टी’ नाममा फिल्म घोषणा गरिएको थियो ।
मिलन चाम्सको निर्देशनमा बन्ने यो फिल्मको यसअघि असोजमा फ्लोरमा जाने र आगामी फागुनमा प्रदर्शनमा आउने घोषणा गरिएको थियो । फिल्म अझै कहिले फ्लोरमा जाने पत्तो छैन तर निर्माण टिमले भने पुनः नयाँ रिलिज मिति तय गरेको छ । सुन्नमा आए अनुसार यो फिल्म तीजको छेकोमा २०७६ को भदौमा रिलिज हुनेछ ।
फिल्म आगामी वैशाखमा फ्लोरमा जाने पनि बताइएको छ । मिलन चाम्सको फिल्म नगर्ने मूडमा अनमोल पुगेको नामका चर्चा र गसिपका बीच निर्देशक अभिनेताको भेट र त्यसपछिको डेभलपमेन्ट सहित फिल्मको प्रदर्शन मिति समेत तय हुँदा अब भने फिल्म बन्ने छनक देखिएको छ ।
मिलन चाम्स र सुदिप खड्का प्रोडक्सनको ब्यानरमा बन्ने फिल्ममा कथा प्रदिप भारद्वाजको रहनेछ । फिल्मको लागी यसअघि नै निर्देशकले अभिनेत्री समेत छनोट गरिसकेका छन् ।
