उमेशको संघर्ष र सफलताको कथामा ‘बोबी २’ घोषणा
दर्शक तथा समिक्षकबाट वाही वाही पाएको अन्तरजातिय प्रेम कथा जोडिएको फिल्म ‘बोबी’ रिलिजको एक बर्ष पनि बितेको छैन। तर निर्माण टिम भने फिल्मको सिक्वेल निर्माणमा जुटेको छ । शनिबार राजधानीमा आयोजित एक कार्यक्रमकाबीच फिल्म ‘बोबी २’को औपचारिक निर्माण घोषणा गरियो ।
कविता गुरुङ र उमेश थापाको वास्तविक कथा बोलेको ‘बोबी’ले देश विदेशका दर्शकबाट तारिफ पाएको थियो । विदेशका विभिन्न शहरहरुमा यो फिल्म अहिलेपनि प्रदर्शनको क्रममा छ । ‘बोबी २’ लाई बाँकी कथा सव- टाइटल दिइएको छ । जहाँ ‘बोवी’मा समेट्न बाँकी भएका यो जोडीका सफलता र संघर्षका कथाहरु समावेश हुनेछन् ।
सिक्वेलमा मुख्यतः उमेशको संघर्ष र सफलताको कथा जोडिने आयोजित कार्यक्रममा जानकारी गराइयो । फिल्मको लिड अभिनयमा उमेश र कविता नै रहनेछन् भने छोरा एलिश थापासँगै कलाकार विजय लामाले अभिनयमा साथ दिनेछन् । नरेश भट्टराई र गिरीराज घिमिरेले स्कृप्ट लेख्नेछन् ।
निर्देशक मिलन चाम्सले उमेशको संघर्षका कथा झनै रोचक रहेको बताए । सुदिप बरालले यो फिल्मलाई छायाँकन गर्नेछन् । पहिलो सिरिजमा जसरी नै नेपाल र नर्बेमा फिल्मांकन हुनेछ । चैत्रको पहिलो साताबाट फिल्म फ्लोरमा जाने बताइएको छ ।
