१६ हजार गाई पाल्ने विपिनको इच्छाः हेर्नुहोस् ‘गोपी’ ट्रेलर

फिल्म ‘गोपी’ माघ १८ बाट दर्शकमाझ आउँदैछ । प्रदर्शनको लागी दिन नजिकिँदै गर्दा निर्माण टिम प्रचारलाई अघि बढाउने ध्येयमा छ । यो बीचमा बुधबार राजधानीमा आयोजित एक कार्यक्रमका बीच निर्माण टिमले ट्रेलर रिलिज गर्यो ।

विपिन कार्की, बर्षा राउत र सुरक्षा पन्त लिड रोलमा रहेको फिल्ममा विपिन गाइ पालक कृषकको भुमिकामा देखिएका छन् । विपिनले अमेरिका नगई नेपालमै १६ हजार गाई पाल्ने प्रतिवद्धता ट्रेलरमा समावेश एक डायलगमा जनाउँछन् । ट्रेलरमा उल्लेखित कलाकारसँगै कमलमणी नेपाल, भोला सापकोटा, अंकित खड्का, प्रकाश घिमिरे लगायत फिचर छन् ।

दिपेन्द्र लामाको निर्देशनमा बनेको फिल्मले कृषि क्रान्तिमा चलिरहेको नेपाली समाजको एक आयाम बोल्छ । धन आर्जनको लागी परिवार तथा आफन्तले देखाएको  विदेश यात्राको बाटोलाई छोडेर देशमै केहि गरुँ भन्ने भावना बोकेको युवकको कथा फिल्ममा पेस गरिएको छ । सामिप्यराज तिमिल्सेनाले यो फिल्मको पटकथा लेखेका छन् । मणिकर्ण केसी निर्माता रहेको फिल्ममा श्रीधर पौडेल कार्यकारी निर्मातामा छन् ।

‘गोपी’लाई शैलेन्द्र डी. कार्कीले छायाँकन गरेका हुन् भने निमेश श्रेष्ठले सम्पादन गरेका छन् । कोरियोग्राफी गोविन्द राईको छ ।