‘दि ब्रेकअप’ रिलिज सर्योः आशिरमान भर्सेज अनमोल भिडन्त पक्का !
उदयिमान स्टारको ट्याग पाएका आशिरमान देशराज जोशी स्टारर फिल्म ‘दि ब्रेकअप’ रिलिज हेरफेर भएको छ । यसअघि पौष २७ लाई प्रदर्शन मिति तय गरेको फिल्म अब आगामी फागुन १७ मा रिलिज हुने भएको छ । निर्देशक हेमराज बिसीले समाचारको पुष्टि गरेका छन् ।
पुर्वनिर्धारित प्रदर्शन मिति आउन एक महिना मात्रै पनि बाँकी नहुँदा फिल्मको प्राविधिक कामहरु नसकिएको भन्दै निर्माण टिमले प्रदर्शन हेरफेर गरेको हो । निर्देशक बिसीले भने, ‘फिल्ममा समावेश हुने २० प्रतिशत भिएफएक्सको कामलाई समय अभाव भएको तथा आवश्यक प्रचार प्रसारमा समय निकाल्न नसकेकोले रिलिज सार्न बाध्य भयौँ, फागुन १७ बाहेक उपयुक्त डेट भेटेनौँ ।’
रोचक कुरा के छ भने सोहि मितिमा स्टार अभिनेता अनमोल केसीको फिल्म ‘क्याप्टेन’ लाग्दैछ । प्रायः कुनै पनि मेकरहरु अनमोलको फिल्म प्रदर्शन हुँदा जुध्य चाहँदैनन् । तर ‘होस्टेल’बाट अनमोललाई डेब्यू दिएका अनि अनमोलको गडफादरको उपमा पाएका हेमराज भने ‘क्याप्टेन’सँगै आफ्नो फिल्म रिलिज गर्न तयार भएका छन् ।
‘उक्त मितिमा पर्याप्त बिदा भएको र नेपाली फिल्मको बजारले दुई फिल्म धान्ने अवस्था आइसकेको भन्दै ‘ब्रेकअप’ भर्सेज ‘क्याप्टेन’ हुँदा कुनै समस्या नआउने निर्देशक बिसी बताउँछन् । ‘जुधाउन खोजेको हैन, सँगसँगै आउँदा दुबै फिल्मलाई फाइदा हुन्छ, बिसीले भने, ‘एउटा फिल्म हेर्ने दर्शकले अर्को फिल्म पनि हेर्नसक्छन् पहिलेको मितिमा ‘चौका दाउ’ थियो, यो मितिमा क्याप्टेन हुँदा पनि आपत्ति छैन ।’ ठुलो लगानीका कारण फागुन भन्दा पछि जान नसक्ने भएका कारण उक्त मिति रोजेको बिसी बताउँछन् ।
‘दि ब्रेकअप’मा आशिरसँगै शिल्पा मास्के, इच्छा कार्की, सरोज खनाल, रेमनदास श्रेष्ठलाई पनि लिड अभिनयमा छन् । निर्देशक बिसीसँगै रुपक थापा, दीपक खतिवडा र रेणु राणाले फिल्मलाई निर्माण गरेका हुन् । सुरेन्द्र पौडेलको सम्पादन रहेको फिल्मको छायाँकन नरेन्द्र मैनालीले गरेका छन् । नेपाल र अष्ट्रेलियामा छायाँकन गरिएको यो फिल्मको यसअघि रिलिज ‘आज हाम्रो’ बोलको गीत हिट लिस्टमा छ भने ‘हरपल’ बोलको गीतले पनि लोकप्रियता बढाउँदो छ ।
