‘बुलबुल’ टिजर रिलिजः हेर्नुहोस् स्वस्तिमाको टेम्पो चालक अबतार (भिडियो)
स्वस्तिमा खडका स्टारर फिल्म ‘बुलबुल’को टिजर रिलिज गरिएको छ । युट्युव मार्फत निर्माण टिमले वर्डवाइड रुपमा टिजर ट्रेलर रिलिज गर्यो । यो फिल्ममा स्वस्तिमाले टेम्पो ड्राईभरको भुमिका निभाएकी छिन् ।
आजभन्दा ४५ दिन अघि बाटोमा नायक नायिकालाई नचाएर बेग्लै तरिकाले गीत सार्वजनिक गरेको बुलबुलको टिजर पनि अनौठो स्वादमा आएको छ । फिल्मको एक दृश्यजस्तो लाग्ने टिजरमा यसअघि चुलबुले भुमिकामा देखिँदै आएकी स्वस्तिमा खडकाको रुप र हुलिया दुरुस्तै आम टेम्पो चालिका युवतीको जस्तै देखिएको छ । साथै सँगै देखिएका नव-अभिनेता मुकुन भुषालको अभिनय पनि स्वाभाविक र दमदार देखिएको छ । टिजर मार्फत चरित्र चित्रण र चलचित्रको स्वाद कस्तो छ भनेर छनक दिन खोजेको देखिन्छ ।
छोटो दृश्यमै दुवै कलाकारले फरक फरक भाव र फरक रसमा सरल तर प्राकृतिक तवरले आफनो अभिनय कौशल देखाउन सफल भएका छन् । आगामी फागुन ३ गते भ्यालेन्टाइनको छेको पारेर प्रदर्शनमा आउने ‘बुलबुल’को ‘खुद्राखाद्री माया’ले बोलको गीत पनि यतिखेर बजारमा लोकप्रियता बढाउने क्रममा छ । फिल्म निर्देशक विनोद पोडेलले पटकपटक ‘बुलबुल’ मार्फत स्वस्तिमा खडकाको अभिनयमा नयाँ अवतार देखिने र फिल्म उद्योगले एक सशक्त नवनायक पनि पाउने दाबी गर्दै आएका छन् ।\
निर्माता अविरल थापाले अब हरेक १० दिनको अन्तरालमा अन्य रोचक र अनौठा प्रचार सामग्रीहरु क्रमश सार्वजनिक हुँदै जाने र फिल्ममा रहेको अर्को गीत पनि छिटै सार्वजनिक गरिने बताए । ‘बुलबुल’का कार्यकारी निर्माता रामराजा दाहाल हुन् भने छायाँकन सुसन प्रजापतिले गरेका छन् । फिल्ममा स्वस्तिमा खडका र मुकुनसँगै, बुद्धि तामाङ्ग , दिपक क्षेत्री , लक्ष्मी बर्देवा, एलिना कार्की , जोयश पाण्डे, उज्जल अधिकारी , सृष्टि भट्टराई आदिको अभिनय रहेको छ ।
