‘प्रसाद’ सुखद ओपनिङ, मल्टिप्लेक्स बुकिङ आक्रामक
प्रतिक्षित फिल्म ‘प्रसाद’ शुक्रबारबाट प्रदर्शनमा आएको छ । ट्रेलर तथा सार्वजनिक गीत संगीतका कारण दर्शकमाझ ‘अवेटेड’ बनेको यो फिल्म प्रदर्शनमा आइसक्दा फिल्मप्रति दर्शकको चासो र उत्साह गज्जबको देखिएको छ ।
दिनेश राउत निर्देशित फिल्मको ‘ओपनिङ डे’को बिहानी शो निकै सुखद रह्यो । राजधानीको चिसिँदो मौसमको प्रवाह नगरी दर्शक बिहानै हल हलमा पुग्दा केहि पर्दा हाउसफूल बन्न समेत पुगे । चाबहिल स्थित गोपिकृष्ण हल अन्तर्गतको कृष्ण पर्दा हाउसफुल बन्यो । यस्तै राजधानीमा मुख्य केन्द्र मानिने अष्टनारायण, गंगा, गुणमा पनि दर्शकको चाप राम्रो रहेको वितरक तथा निर्माण टिमले बताएको छ ,।
उता फिल्म बिजनेसको लागी मुख्य केन्द्र मानिने मल्टिप्लेक्स हलमा यो फिल्मप्रति दर्शकको आकर्षण उत्कृष्ट देखिएको छ । फिल्मले क्यूएफएक्स चेन अन्तर्गत शुक्रबारको लागी पाएका सबैजसो शो मा अग्रिम टिकट बुकिङ आक्रामक देखिएको छ । अधिकांश टिकट ‘शो पुर्व सोल्ड’ हुनेक्रममा रहँदा शनिबारको लागी उपलब्ध शोजहरुमा पनि दर्शकको आकर्षण लोभलाग्दो देखिएको छ । मोफसलमा पनि फिल्मको सुरुवाती शो सुखद पाइएको छ ।
सुभाष थापाको निर्माणमा बनेको फिल्मको स्कृप्ट सुशिल पौडेलले लेखेका हुन् । फिल्ममा विपिन कार्की, नम्रता श्रेष्ठ, निश्चल बस्नेत लिड अभिनयमा छन् । रिलिज पुर्व गरिएको प्रिमियरमा पनि फिल्मले प्रशंसा भेटेको थियो । ‘प्रसाद’ले उठाएको विषयवस्तु तथा कलाकारहरुको प्रस्तुतीकरणमा दर्शकले तारिफ दिएका छन् ।
