१८ महिनापछि पर्दामा फर्किँदै नम्रताः ‘प्रसाद’ले थप्ला सफलताको अर्को इट्टा ?

सुन्दरता अनि अभिनय दुबैमा फिट अनि हिट नाम हो नम्रता श्रेष्ठ । अभिनयकी खानी भनेर चिनिने नम्रताले आफ्ना हरेकजसो फिल्मबाट दर्शकलाई आकर्षण छर्छिन् ।

आम नेपाली अभिनेत्री भन्दा कम फिल्म खेल्ने, लामो अन्तरमा मात्रै पर्दामा आउने कारण पनि नम्रता अनि उनको जीवनशैलीलाई दर्शकले पछ्याउँछन् । त्यसो त अन्य सेलिब्रेटी जस्तो बारबार मिडियामा आइरहनेमा पनि नम्रता पर्दिनन् ।

उनै नम्रता १८ महिनाको लामो अन्तरमा पर्दामा आउँदैछिन् फिल्म ‘प्रसाद’ मार्फत । अभिनय कुौशलताले भरिपुर्ण यी सुन्दरीको यो फिल्म यहि मंसिर २१ लाई प्रदर्शनको लागी तयार हुँदा पुनः एकपटक उनले माहोल गर्माउने निश्चित प्रायः बनेको छ । फिल्मको सार्वजनिक गीत र ट्रेलरले यहि संकेत गर्छ ।

‘प्रसाद’मा समावेश ‘लै लै’ बोलको गीत हिट लिस्टमा परिसक्दा ट्रेलरलाई पनि दर्शकले माया दिएका छन् । फिल्मले उठाएको विषय, त्यसमा पनि ट्रेलरमै जमेको नम्रता र विपिन कार्कीको गज्जबको केमेष्ट्रिलाई दर्शकले ‘वाउ’ भनिसक्दा सार्वजनिक प्रचार सामाग्रीहरु प्रसादका सफलताका सुचक बनिरहेका छन् ।

यसअघि रिलिज फिल्म ‘पर्व’ त्यो पहिलेको ‘क्लासिक’ लगायत प्रायः फिल्मको अभिनयले प्रशंसा सङ्गालेकी नम्रताको करियरमा त्यस्तै अर्को फिल्म ‘प्रसाद’ थपियो भने उनको लोकप्रियतालाई अन्य अभिनेत्रीले सायदै भेट्न सक्लान् ।

नेशनल अवार्ड विनर नम्रता हरेकजसो फिल्ममा आफु र आफ्नो अभिनयलाई पृथक बनाउने कोशिश गर्छिन् र सोहि प्रकारको कथामा मात्रै काम गर्छिन् । ‘प्रसाद’पछि आउने फिल्म ‘जाइरा’ पनि यसको उदाहरण हो । उक्त फिल्ममा नम्रताले छोटो केशमा ‘बक्सिङ’ खेलाडीको भुमिका निभाएकी छिन् ।

‘प्रसाद’ले सफलता पाउँदै गर्दा नम्रताको करियरले थप नयाँ उचाइ लिनेछ । लामो अन्तरमा पर्दामा आउँदै गरेकी उनको करियरमा यो फिल्मले उनको सफल अभिनय करियरमा अर्को इट्टा थप्नसक्छ । तर सबैजसो फिल्ममा व्यापारिक सफलतालाई भन्दा पनि आफ्नो कामलाई प्राथमिकता दिने नम्रताले यो पटक कस्तो काम गरेकी छिन् त्यसको लागी भने मंसिर २१ पर्खिनैपर्छ ।

दिनेश राउतको निर्देशनमा बनेको ‘प्रसाद’को स्कृप्ट सुशिल पौडेलले लेखेका हुन् । सुभाष थापाको निर्माण रहेको फिल्ममा नम्रता, विपिनसँगै निश्चल बस्नेत लिड अभिनयमा छन् । सांगितिक रुपमा फिल्मले आफुलाई अब्बल प्रमाणित गरिसकेको छ ।

https://youtu.be/xfTQYSSxeLQ