‘दि कर्मा’ रिलिज सर्यो, माघ पहिलो साता आउने
यसअघि मंसिर ७ लाई प्रदर्शन मिति तय गरेको फिल्म ‘दि कर्मा’को रिलिज हेरफेर भएको छ । अब यो फिल्मको रिलिज माघ ४ गतेलाई सरेको छ । निर्माता जयराज रायले विशेष कारणवस प्रदर्शन मिति हेरफेर गरिएको बताए ।
फिल्मलाई देव कुमार श्रेष्ठले निर्देशन गरेका हुन् । नेपाल र भारतको सिमा क्षेत्रमा हुने घटनामा बनेको फिल्ममा रामेश्वर कार्कीको छायांकन छ । जय मिडिया म्यानेजमेन्ट प्रा.लि.को ब्यानरमा बनेको ‘दि कर्मा’ को कथा निर्माता राय आँफैले लेखेका हुन् । निशा खतिवडा निर्मात्रीको रुपमा रहेको फिल्मको अधिकांश छायांकन नेपालको तराई क्षेत्रमा गरिएको छ ।
भारतका मोडल तथा कलाकार करण वर्माको अभिनय रहेको यो चलचित्रमा करणका अलावा नीता ढुंगाना, परमिता राज्यलक्ष्मी राना, बुद्दी तामाङ्ग, देव कुमार श्रेष्ठ, अनुप सक्सेना, संगीता नापितलगायतका कलाकारहरुको अभिनय रहेको छ ।
‘दि कर्मा’को स्क्रिनप्ले र डाइलग शुशील पोखरेलले लेखेका छन् । फिल्मलाई काठमाडौंमा काफिया फिल्मस् र उपत्यका बाहिर बैङकेटेश ईन्टरटेन्मेन्टले वितरण गर्नेछ ।
