फ्लोरमा ‘वीर बिक्रम २’, जोमसोममा जोडी बाँध्दै पल र बर्षा
फिल्म ‘वीर बिक्रम २’ फ्लोरमा गएको छ । केहि दिन पहिले मात्रै लिड अभिनेतामा आकाश श्रेष्ठलाई पल शाहले रिप्लेस गरेको यो फिल्मको छायांकनको लागी निर्माण टिम सहित कलाकारहरुको टोली मुस्ताङ पुगेको हो ।
मुस्ताङमा फिल्मको पहिलो गीत छायाँकन हुनेछ । निर्देशक मिलन चाम्सले अभिनेता पलसँगै अभिनेत्री बर्षा शिवाकोटी र कोरियोग्राफर कविराज गहतराज, छायाँकार सुदीप बरालसहितको टिम लिएर जोमसोम ल्याण्ड गरेका छन् । फिल्मको गीत छायाँकनपछि केहि दृश्यहरु पनि मुस्ताङमै छायाँकन गरिने बताइएको छ ।
यो फिल्मलाई निर्देशक चाम्सले हिट फिल्म ‘वीर बिक्रम’को सिक्वेलको रुपमा भने नबुझ्न दर्शकलाई आग्रह गरेका छन् । ‘वीर बिक्रम’का लिड कलाकार दयाहाङ राई, अनुपबिक्रम शाहि र अभिनेत्री दीया पुनः बाहिर हुँदा बर्षा र पलसँगै नाजिर हुसैन, बुद्धी तामाङ, मनोज केसी, विनिषा भण्डारी, मनिष लिम्बु लिड अभिनयमा रहनेछन् ।
यो फिल्मको स्कृप्ट प्रदीप भारद्वाजले लेखेका छन् । भारद्वाजकै पटकथा समावेश यस फिल्ममा रञ्जित गजमेर, राजनराज शिवाकोटी र ताराप्रकाश लिम्बूको संगीत रहनेछ। फिल्ममा कविराज गहतराजको नृत्य निर्देशन र हिमाल केसीको द्वन्द्व रहनेछ।
