आशिर र शिल्पाको ब्रेकअपः फर्स्टलुक पोस्टर रिलिज
फिल्म ‘दि ब्रेकअप’मा समावेश गत हप्ता रिलिज गीत ‘आज हाम्रो भेट भाको दिन’ ले यतिबेला सामाजिक सञ्जालमा लोकप्रियता बढाउँदो छ । युट्युव ट्रेण्डिङमा हालसम्म पनि ‘टप टेन’ भित्र आफुलाई सुरक्षित गर्दा उक्त गीतले १० लाख बराबर भिजिट पाइसकेको छ । यो बीचमा तिहारको शुभकामना सहित निर्माण टिमले फिल्मको फर्स्टलुक पोस्टर सार्वजनिक गरेको छ ।
आगामी पौष २७ बाट दर्शकमाझ आउने फिल्मको सार्वजनिक पोस्टरमा लिड अभिनेता आशिरमान देशराज जोशी र अभिनेत्री शिल्पा मास्केलाई प्रेमिल मूडमा देख्न सकिन्छ । आशिरको काखमा शिल्पा रोमान्टिक देखिएकी छिन् ।
रेड ब्याकड्रपको थिममा सार्वजनिक पोस्टरले निरन्तर रिलिज हुँदै आएका नेपाली फिल्मका पोस्टरहरु भन्दा केहि फरक स्वाद पस्केको भान हुन्छ । अन्य लिड कलाकार भने पोस्टरमा समावेश छैनन् ।
हेमराज बिसी निर्देशित फिल्ममा आशिर र शिल्पासँगै इच्छा कार्की, रेमनदास श्रेष्ठ, सरोज खनाल लिड अभिनयमा छन् । अष्ट्रेलिया र नेपालमा छायाँकन गरिएको फिल्मलाई नरेन्द्र मैनालीले खिचेका छन् । रुपक थापा, दीपक खतिवडा, रेनु राणा र निर्देशक बिसीको संयुक्त लगानीमा निर्माण भएको ‘दि ब्रेकअप’मा सुरेन्द्र पौडेलको सम्पादन छ ।
