‘वीर बिक्रम २’ औपचारिक घोषणा, बर्षासँग आकाशको रोमान्स पक्का
तीन बर्ष पहिले रिलिज फिल्म ‘वीर बिक्रम’को सिक्वेल निर्माण हुने भएको छ । राजधानमा आयोजित एक कार्यक्रमका बीच निर्देशक मिलन चाम्सले ‘वीर बिक्रम २’ को औपचारिक निर्माण घोषणा गरे । सिक्वेलमा लिड कलाकार, दीया पुनः दयाहाङ राई र अनुपबिक्रम शाही भने हुनेछैनन् ।
कार्यक्रममा लिड अभिनयमा रहने कलाकारहरु पनि सार्वजनिक भए । तामझामका साथ कलाकार आउँदा माहोल गर्मेको थियो । यो फिल्ममा लिड अभिनयमा आकाश श्रेष्ठ, बर्षा शिवाकोटी, नाजिर हुसैन, बुद्धी तामाङ, मनोज केसी, विनिषा भण्डारी, मनिष लिम्बु लिड अभिनयमा रहनेछन् ।
निर्देशक चाम्सले ‘बीर बिक्रम’बाट नाम सापटी लिइएपनि फिल्मको कथाले सिक्वेल नछुने दाबी गरे । फिल्मको स्कृप्ट सञ्चारकर्मी सुशिल पौडेलले लेखेका छन् ।
प्रदीप भारद्वाजको पटकथा समावेश यस फिल्ममा रञ्जित गजमेर, राजनराज शिवाकोटी र ताराप्रकाश लिम्बूको संगीत रहनेछ। फिल्ममा कविराज गहतराजको नृत्य निर्देशन, हिमाल केसीको द्वन्द्व तथा सुदीप बरालको छायांकन रहनेछ ।
‘चाम्स इन्टरटेन्टमेन्ट’ र ‘लण्डन सिने आई’को संयुक्त व्यानरमा निर्माण हुने फिल्मको छायांकन कात्तिक २६ गतेबाट सुरु गरिने कार्यक्रमका जानकारी गराइयो ।
तश्विरः गणेश वस्याल
