‘चङ्गा चेट’ले काट्यो डेढ करोडको केक, संगीतकारलाई ५० हजार इनाम !
शर्मिला पाण्डे र माधव वाग्लेको निर्माणमा बनेको फिल्म ‘चङ्गा चेट’मा समावेश ‘गोजीमा दाम छैन’ बोलको गीतले युट्युवमा डेढ करोड बढि भ्यूज पाएको छ । शुक्रबारबाट प्रदर्शनको क्रममा रहेको फिल्म निर्माण टिमले प्रदर्शनको पुर्व सन्ध्यामा गीत हिटको खुशीयाली साटेको छ ।
राजधानीमा आयोजित एक कार्यक्रमका बीच मिडियाकर्मीमाझ निर्माण टिम तथा कलाकार र संगीतकार सहितको टोलीले केक काट्यो । केकमा १ करोड ५० लाख बढि भ्यूज पाएको गीतको नाम इङ्कित थियो ।
निर्देशक दिपेन्द्र के खनाल, निर्माता द्वय पाण्डे र वाग्लेसँगै संगीतकार राजनराज शिवाकोटी, अभिनेत्री सुरक्षा पन्त र परमिता आर एल राना, लेखक प्रदिप भारद्वाज, गीतकार हरिहर तिमिल्सिनाले संयुक्त रुपमा केक काटे । स्टार कलाकारको जम्बो टोली रहेको फिल्मका अन्य कलाकार भने उपस्थित रहेनन् ।
सामाजिक सञ्जालमा पनि निकै लोकप्रिय बनेको उक्त गीत ‘टिकटक’मा हिट छ । फिल्मको ट्रेलरलाई पनि दर्शकले माया दिएका छन् । यसैबीच उक्त कार्यक्रममा निर्माता वाग्लेले संगीतकार शिवाकोटीलाई ५० हजार इनाम दिएका छन् ।
गीत हिट भएको खण्डमा बोनस दिने घोषणा गरेको भन्दै हिटपछिको खुशीमा संगीतकारलाई ५० हजार बोनस प्रदान गरकेो वाग्लेले बताए । उक्त रकमबाट ५ प्रतिशत गीतकार तिमिल्सिनाले पाउनेछन् । ‘चङ्गा चेट’मा सुरक्षा र परमितासँगैप्रियंका कार्की, आयुष्मान देशराज जोशी, सन्दीप क्षेत्री, रविन्द्र झा लिड रोलमा छन् ।
