‘मालिका’मा झल्केको नारी शक्ति र साहस ( चार पोस्टर रिलिज)

रेखा थापा निर्देशित फिल्म ‘मालिका’ यतिबेला रिलिजको लागी तयार छ । कार्तिक १६ मा प्रदर्शमा आउने फिल्मको प्रचार प्रसारमा रेखा मरिमेटेर लागेकी छिन् । प्रायः फिल्ममा सामाजिकपनासँगै महिला अधिकार र शक्ति झल्काउन खोज्ने रेखाले यो पटक पनि सोहि प्रकारको विषय उठान गरेकी छिन् ।

महिला अधिकारको पक्षमा लड्दै नारीप्रधान फिल्म निर्माणमा सकृय रेखाले यो पटक बाल विवाह विरुद्धको आवाज लिएर आउँदै छिन् । सुदुर पश्चिमेली किशोरी कमला वलीलाई रेखाले आफुसँगै मुख्य भुमिकामा राखेर फिल्म तयार गरेकी हुन् ।

हालै फिल्मका चार पोस्टर एकसाथ रिलिज भएका छन् । जहाँ नारीको शक्ति, साहस झल्केको छ । घोडा सवारदेखि दमन र अत्याचार विरुद्ध लड्न व्यक्त भएका आक्रोश सहितका केहि प्रतिनिधि दृश्य पोस्टरमा देख्न सकिन्छ ।

रेखासँगै नर कार्कीको कथामा तयार भएको फिल्ममा कार्की कार्यकारी निर्मातामा छन् । सरस्वति थापा निर्मात्री हुन् । फिल्मको ‘हल्का माया के माया’ बोलको गीत हिट लिस्टमा परिसक्दा सामाजिक सञ्जालमा पनि यसको चर्चा दिनहुँ बढिरहेको छ ।