‘जात्रै जात्रा’ अफिसियल घोषणा, ‘क्याप्टेन’सँग भिड्न तयार
हिट फिल्म ‘जात्रा’को सिक्वेल ‘जात्रै जात्रा’को अफिसियल घोषणा भएको छ । राजधानीमा बिहिबार आयोजित एक कार्यक्रमका बीच निर्माण टिमले फिल्म निर्माणको औपचारिक जानकारी गरायो ।
फिल्मको निर्माण टिममा प्रायः सबै दोहिरिँदा लिड कलाकार पनि सोहि प्रकार रहनेछन् । विपिन कार्की, बर्षा राउत, रविन्द्र सिंह बानियाँ, रविन्द्र झा लिड अभिनयमा रहँदा प्रकाश घिमिरे, सोहित मानन्धर, अन्जु महर्जन, सुस्मिता कार्की, प्रेम पाण्डे, कालु राना, प्रियंका झा, कविन्द्र त्रिपाठी लगायतको पनि फिल्ममा भुमिका रहनेछ ।
दशैको अन्तिम दिन कोजाग्रत पूर्णिमाको भोलिपल्टबाट फ्लोरमा जाने फिल्मलाई ३५ दिनमा छायाँकन सकाउने बताइएको छ । प्रदिप भट्टराईको निर्देशन रहने फिल्मको कथा पनि भट्टराईको नै हुनेछ । सिंगे लामा र यादव पौडेल निर्माता रहने फिल्मको कार्यकारी निर्मातामा रविन्द्रसिंह बानियाँ हुनेछन् ।
छायांकन शिवराम श्रेष्ठको रहने फिल्मलाई सम्पादन मित्र डी गुरुङले गर्नेछन् । कार्यकारी निर्माता तथा लिड कलाकार रविन्द्र सिंह बानियाँले ‘जात्रा भन्दा राम्रो कथा नपाएसम्म यसको सिक्वेल नबनाउने बताएको भन्दै त्यो भन्दा राम्रो कथा पाएपछि यसको सिक्वेल बनाउन लागेको बताए ।
निर्देशक प्रदिप भट्टराईले यो चलचित्रले पैसाको मात्र कथा नबोल्ने भन्दै यसपटक दर्शकले झनै विशेष सरप्राइज चलचित्रमा पाउने बताउँदै जात्रा सकिएको ठाउँबाट नै जात्रै जात्राको कथा उठ्ने खुलाए । फिल्मलाई असन र बौद्धमा खिचिनेछ ।
यसैबीच पुर्वघोषित प्रदर्शन मिति फागुन १७ बाट फिल्म रिलिज नसर्ने समेत कार्यक्रममा निर्माण टिमले घोषणा गरेको छ । सोहि मितिमा अनमोल केसी स्टारर फिल्म ‘क्याप्टेन’को समेत रिलिज तोकिँदा ‘जात्रै जात्रा’ टिमले पनि आफुहरु सोहि मितिमै आउने बतायो ।
नेपाली फिल्मको बजार बिस्तार भइरहँदा एकै मितिमा दुई फिल्म आउनुलाई भयंकर नसम्झिन आग्रह गर्दै निर्देशक भट्टराईले सोहि मितिमा ‘क्याप्टेन’ आउँदा आफूहरु भिड्नको लागी तयार रहेको घुमाउरो पाराले घोषणा गरे ।
