टिकटक च्यालेन्ज बिजेतालाई आकाश र आश्माको उपहार
प्रेमकथानक फिल्म ‘ड्रिम गर्ल’ ले प्रचार अभियानमा जोडेको टिकटक म्युजीकल्ली च्यालेन्जका बिजेतालाई आइतबार उपहार प्रदान गरेको छ ।
मंसिर ७ गतेबाट प्रदर्शन हुन लागेको फिल्मको युनिटले केही समयअघि सुरु गरेको सो प्रतिस्पर्धाको दोश्रो चरणका बिजेतामा शिशिर अर्याल,बन्दना थापा, नीना पाख्रिन, दर्शन काजी थापा, मनिषा राना,बिशालबाबु आचार्य, अभेलिना खड्का, रोश्मी राई, सृजना श्रेष्ठ मगर,अनिशा ड्रिम्स, नेपाली बर्षा र सदिक्षा क्षेत्री छन् ।
उनीहरुलाई ‘ड्रिम गर्ल’ अर्थात् फिल्मकी डेब्यु हिरोइन आश्मा गिरी, अभिनेता आकाश श्रेष्ठ, निर्देशक ऋषिराज आचार्य, हाँस्य अभिनेता शिशिर भण्डारीलगायतले उपहार प्रदान गरेका थिए ।
टिकटक च्यालेन्जका लागि ‘ड्रिम गर्ल’ का ‘तिम्रो मायामा हराउन थालेको’ र ‘फूल टिपेर चढाए’ बोलका दुई गीतका ट्रयाक नेपाल म्युजीकल्ली अफिसियल र आवाज नेपालमा अपलोड गरिएका थिए । प्रतिस्पर्धाले ती ट्रयाकमा म्युजीकल्ली भिडियो बनाएका थिए । उत्कृष्ट म्युजीकल्लीलाई साप्ताहिक रुपमा पुरस्कृत गर्ने गरिएको प्रतियोगीता संयोजक समेत रहेकी अभिनेत्री आश्माले जानकारी दिइन् ।
ऋषिराजकै लेखन रहेको फिल्म फिल्ममा आश्मा र आकाशका साथमा विल्सन बिक्रम राई, शिसिर भण्डारी,पूजा पराजुली,लक्ष्मी गिरी, अर्जुन श्रेष्ठलगायतका कलाकारले अभिनय गरेका छन् । अर्जुन शर्मा, रामेश्वर धिताल र ऋषिराज स्वयम् निर्माता रहेको फिल्म निर्माणमा दक्षिण भारतीय कम्पनी रिल एण्ड रियल सिनेमाले सहकार्य गरेको छ ।
