ट्रेलरमा हेर्नुहोस रेखाको ‘मालिका’ (भिडियो)

रेखा थापा स्टारर फिल्म ‘मालिका’को ट्रेलर रिलिज भएको छ । दिपावलीको अबसरमा प्रदर्शनमा आउने फिल्मको शुक्रबार राजधानीमा आयोजित एक कार्यक्रमका बीच ट्रेलर रिलिज गरियो ।

रेखाले आफ्नै निर्देशनमा यो फिल्म तयार पारेकी छिन् । बालबिबाहको विषयलाई उठान गरेको फिल्ममा रेखासँगै सुदुर पश्चिमेली किशोरी कमला वली लिड अभिनयमा छिन् । फिल्मको अधिकांश दृश्य पश्चिम नेपालमा खिचिएको छ ।

प्रायः महिला अधिकारको पक्षमा आवाज उठाउने फिल्म निर्माण गर्ने रेखाले यो पटक पनि महिला सशक्तिकरणमा आवाज बुलन्द पार्ने प्रयास गरेकी छिन् । महिला अधिकार र सशक्तिकरणका पक्षमा ट्रेलरमा समावेश केहि संवाद दमदार लाग्छन् ।

शिवम अधिकारीको पटकथामा तयार भएको फिल्ममा कथा रेखासँगै नरबहादुर कार्कीको छ । सुरेश अधिकारी र एसडी योगीले संगीत भरेका छन् । बनिश शाहले फिल्मलाई सम्पादन गरेका छन् ।