प्रदिपको ‘लभ स्टेशन’ सुरु: जसितासँग प्रेम, प्रकाशसँग फाइट !
फिल्म ‘लभ स्टेशन’को शुभ मुहर्त गरिएको छ । सोमबार बिहान पशुपती मन्दिरमा पुजा-आजा गरि निर्माण टिम तथा कलाकारहरुले सफलताको कामना गरे । फ्लोरमा भने शुक्रबार मात्रै जानेछ ।
दार्जिलिङबाट छायाँकन सुरु हुने फिल्ममा लिड अभिनयमा प्रदिप खड्का, जसिता गुरुङ र प्रकाश शाह रहनेछन् । प्रदिप र जसिताको प्रेमो अगाडी प्रकाश ‘भिलेन’ अबतारमा रहने बताइएको छ । मंगलबार फिल्म यूनिट दार्जिलिङतर्फ प्रस्थान गर्नेछ ।
फिल्ममा निरुता सिंह, सरोज खनाल र श्रद्धा क्षेत्री पनि मुख्य अभिनयमा रहनेछन् । गोविन्द शाहीको निर्माणमा बन्न लागेको फिल्मलाई उज्जल घिमिरेले निर्देशन गर्नेछन् । ५० दिनको छायाँकन सेड्यूअलमा फिल्म यूनिट दार्जिलिङ प्रस्थान गर्दा सिक्किम, कालिङपोङ लगायतका ठाउँका दृश्यहरु पनि ‘लभ स्टेशन’मा रहनेछन् ।
पारिवारिक प्रेमकथामा आधारित रहेकाले विगतको फिल्म भन्दा केही पृथक लभ स्टेशन बन्ने पनि प्रदीपले बताए । यसअघि ‘लिलिविली’मा प्रदीप खड्का र जसिता गुरुङको जोडीलाई दर्शकले मन पराउँदा आफ्नो जोडि र फिल्मको कथाले गर्दा आफू उत्साहित रहेको प्रदीपले थपे ।
आलोक शुक्लाको छायाँकन रहने ‘लभ स्टेशन’मा शम्भुजीत बासकोटा, दीपक शर्मा, राजनराज शिवाकोटी र एलिश कार्कीको संगीत रहने छ। काफिया फिल्म्स् को ब्यानरमा फिल्म बन्नेछ ।
