‘छक्का पञ्जा ३’ ट्रेलर सार्वजनिक, रिलिज डेट घोषणा (भिडियो)
बर्ष २०७५ कै प्रतिक्षित फिल्म ‘छक्का पञ्जा ३’को ट्रेलर रिलिज भएको छ । प्रदर्शन मिति नजिकिँदै जाँदा निर्माण टिमले शनिबार राजधानीमा आयोजित एक कार्यक्रमका बीच फिल्मको ट्रेलर रिलिज गर्यो ।
ट्रेलरले छक्का पञ्जा सिरिजको ‘कमेडी प्याटन’लाई निरन्तरता दिएको छ । यसअघि वैदेशिक रोजगारको पीडा झल्काएका दिपकराज गिरी र दीपाश्री निरौलाले यो पटक स्कुलको कथा उठाएका छन् । अंग्रेजी पढ्न नजान्ने पात्र स्कुलमा अंग्रेजी विषय नै पढाउने युवतीको प्रेममा परेपछि उत्पन्न परिवेश फिल्मले बोल्नसक्ने छनक ट्रेलरले दिएको छ ।
लिड अभिनेत्री भनिएकी प्रियंका कार्की ट्रेलरमा फिचर नहुँदा निर्माण टिमले अन्ततः प्रियंकाको भुमिका अतिथी मात्रै रहेको खुलाएको छ । अभिनेत्री दीपिका प्रसाइँ मात्र ट्रेलरमा फिचर छन् । अन्य कलाकार दीपकराज गिरी, जितु नेपाल, केदार घिमिरे, बुद्धि तामाङ, लक्ष्मी गिरी, निर शाह, अनुरागमान सिंह कुवंर लगायत ट्रेलरमा हाबी छन् ।
दीपाश्रीको निर्देशन रहेको फिल्मको अफिसियल रिलिज डेट पनि तए भएको छ । यसअघि दशैँ मात्रै बोलिएको फिल्म अब दशैँको पहिलो दिन अर्थात घटस्थापनाको दिन रिलिज हुने घोषणा गरिएको छ ।
