नम्रता र विपिनको प्रसाद: फर्स्टलुकसँगै लिरिकल भिडियो रिलिज
विपिन कार्की, नम्रता श्रेष्ठसँगै निश्चल बस्नेत स्टारर फिल्म ‘प्रसाद को ‘लै लै’ बोलको गीतको लिरिकल भिडियो सार्वजनिक भएको छ । फिल्मको फर्स्टलुकसँगै केहि चल तथा अचल दृश्यहरु भिडियोमा समावेश छन् ।
लिरिकल भिडियोमा उल्लेखित मुख्य तीन कलाकार नै फिचर छन् । निःसन्तान दम्पत्तिबीचको माया र सम्बन्धको कथा बोल्ने ‘प्रसाद’मा विपिन र नम्रताले दम्पत्तिको भुमिका निर्वाह गरेका छन् । लिरिकल भिडियोमा विपिनलाई दर्जीको भुमिकामा देखाइएको छ ।
केतन क्षत्रीले गाएको ‘लै लै’ बोलको उक्त गीत गणेश शाहीले लेखेका हुन् भने संगीत सुवाष भुषालले दिएका छन् । गीतको एरेन्ज उदयराज पौडेलले गरेका हुन् । निर्देशक दिनेश राउतले ‘प्रसाद’को पुरा मर्मलाई ‘लै लै’बोलको गीतले समेट्ने भएकोले नै फस्टलुकसहित यस गीतलाई सार्वजनिक गरिएको बताए ।
सुवास थापाको निर्माण रहेको प्रसादको पटकथा तथा संवाद पत्रकार सुशील पौडेलले तयार पारेका हुन् । सन्तान सुख नपाउँदा उत्पन्न मानसिक, सामाजिक द्धन्द्धले आपसी सम्बन्धमा के कस्तो असरसम्म पुराउन सक्छ भन्ने कुरा फिल्मको मुख्य विषयवस्तु हो ।
युट्युबबाट गीत रिलिजसँगै फिल्म युनिट आइतबार साँझ नै त्यसको प्रतिक्रिया बुझ्न र फिल्मबारेमा जानकारी दिन फेसबुकमा प्रत्यक्ष कुराकानीका लागि प्रस्तुत हुन लागेको निर्देशक राउतले बताए । प्रसाद मंसिर २१ देखि देशव्यापी प्रदर्शनमा आउँदैछ । गत महिना मात्रै फिल्मको सम्पुर्ण छायाँकन सकिएको थियो । ‘प्रसाद’ यतिबेला पोष्ट प्रोडक्सनको क्रममा छ ।
