‘इन्टु मिन्टु लण्डनमा’ गीत रिलिजः धिरज छोडेर सारुकसँग साम्राज्ञी !
फिल्म ‘इन्टु मिन्टु लण्डनमा’ यतिबेला चर्चामा छ । सार्वजनिक भएको ‘उडायो हावाले’ र ‘लण्डनमा’ बोलको गीत अनि ट्रेलरले राम्रै हाइप बनाइसकेको छ । धेरै दर्शकलाई यो फिल्म प्रतिक्षित बनिसकेको छ । सांगितिक रुपमा सशक्त देखिसकिएको फिल्मको हालै अर्को गीत रिलिज गरियो ।
असोज ५ बाट प्रदर्शनमा आउने फिल्मको सार्वजनिक ‘पार्टी सङ्ग’मा अभिनेत्री साम्राज्ञी राज्यलक्ष्मी शाहले अभिनेता सारुक ताम्राकारसँग जोडी बाँधेकी छन् । मुख्य लिड अभिनेता धिरज मगर भने अटाएका छैनन् । सारुकसँगको यो गीत बाहिर आउँदा नै फिल्मले त्रिकोणात्मक प्रेमकथा बोल्ने प्रष्ट हुन्छ ।
बुधबार राजधानीमा आयोजित प्रेस सम्मेलनमा निर्माण टिम उत्साहित देखियो । डान्सिङ नम्बरलाई पनि यसअघि रिलिज गीतलाई जस्तै दर्शकले माया दिने विश्वास निर्देशक रेनशा राईले पोखिन् । सार्वजनिक ‘जुरायो…’ बोलको गीतमा स्वर राजेशपायल राई र मेलिना राईको छ भने संगीत बसन्त सापकोटाले भरेका छन् । सापकोटाले नै गीतको शब्द लेखेका हुन् ।
आइकोर फिल्मस् को ब्यानरमा बनेको फिल्मलाई प्रज्वल समशेर जबराले निर्माण गरेका हुन् । कोरियोग्राफीमा सफल रेनशाको यो डेब्यू निर्देशन हो । फिल्ममा बिजय लामा, दिल भुषण पाठक, रुबी राणा पनि लिड अभिनयमा छन् ।
तश्विरः कुशल घतानी
