टिजरमा हेर्नुहोस् बहु-पतिप्रथाको कथा बोल्ने ‘छिरिङ’ (भिडियो)
यशकुमार र निमा रुम्बा स्टारर फिल्म ‘छिरिङ’को टिजर ट्रेलर रिलिज भएको छ । हिमालपारीको जिल्ला मुस्ताङको बहुपति प्रथालाई जोडेर तयार गरिएको फिल्मको प्रदर्शन मिति आगामी असोज १२ लाई तय गर्दै निर्माण टिमले टिजर सार्वजनिक गरेको हो ।
पछिल्लो पटक सार्वजनिक गीतले लोकप्रियता बढाउँदै जाँदा बाहिर ल्याइएको टिजरमा मुख्य कलाकार निमा, यशकुमारसँगै डेब्यू अभिनेत्री कामना भुजेल लगायत फिचर छन् ।
चर्चित गायक निमाले अभिनय गरेको ‘कागबेनी’ रिलिजपछिको ‘छिरिङ’ पहिलो फिल्म हो । पाश्र्वगायक एवं अभिनेता समेत रहेका यशकुमारले यही फिल्मबाट निर्देशनमा पाइला अघि बढाएका हुन् ।
दुई पति भएकी युवतीले भोग्नुपरेको भौतिक, मानसिक, सामाजिक र सांस्कृतिक द्धन्द्ध फिल्मको कथावस्तु हो । उपल्लो मुस्ताङको सेट खडा गरिएको फिल्मले त्यहाँ चल्तीमा रहेको बहुपतिप्रथाको कथा पेश गर्छ ।
सुनिल माथेमा प्रधान, आइबी दर्नाल र नवीन बुढाथोकीको निर्माण रहेको फिल्ममा मानकृष्ण महर्जनको छायांकन, मिलन श्रेष्ठ र साहिल खानको सम्पादन छ । फिल्म आगामी असोज १२ गते देशव्यापी रिलिज हुँदैछ ।
