माधव वाग्लेको ‘चङ्गा चेट’ रिलिज घोषणा, एक हप्ता नबित्दै रेखाको ‘मालिका’सँग फाइट !
माधव वाग्ले निर्मित फिल्म ‘चङ्गा चेट’ले पहिलो चल प्रचार सामग्री सार्वजनिक गर्दै रिलिज मिति घोषणा गरेको छ । सोमबार आयोजित एक कार्यक्रमका बीच गीत रिलिज गर्दै फिल्मको अफिसियल रिलिज कार्तिक १६ लाई तोकिएको हो ।
निर्देशक दिपेन्द्र के खनालले फिल्मको पोष्टको काम सकाएर आवश्यक प्रचार समयलाई मध्यनजर गरेर उक्त मिति रोजेको बताए । कार्तिक १६ मा यो फिल्म रिलिज हुँदा एक हप्ता नपुग्दै रेखा थापाको निर्माण, निर्देशन तथा अभिनय रहेको फिल्म ‘मालिका’सँग भिडन्त हुनेछ ।
रेखाले यसअघि नै तिहार रिलिज घोषणा गरिसकेकी छिन् । लक्ष्मीपूजाको दिन कार्तिक २१ मा ‘मालिका’ रिलिज हुँदा ‘चङ्गा चेट’ छैटौँ दिनको प्रदर्शनको क्रममा हुनेछ । उक्त मितिमा ‘क्याप्टेन’ समेत आउने चर्चा छ । यति अनमोल केसी स्टारर क्याप्टेन प्रदर्शनमा आयो भने फिल्महरु बीचको फाइट रोचक हुनेछ ।
