गोपी’मा राउत भित्रिएपछि शिवाकोटीमाथी सुरक्षाको ब्यङ्ग्य !
अभिनेत्री सुरक्षा पन्त र बर्षा शिवाकोटी पछिल्लो पटक ‘भेरै’ फिल्ममा सँगसँगै काम गरे । यो फिल्म रिलिज हुँदा नहुँदा ‘गोपी’ नामको नयाँ फिल्मको घोषणा भयो जहाँ यी दुबै सुन्दरी एकसाथ रहने बताइयो । तर फिल्म घोषणा भएर फ्लोरमा नजाँदै बर्षा सुरक्षा एकसाथ दोश्रोपटक टिमअप हुने सपना तुहिएको छ ।
हालै बर्षाले ‘गोपी’बाट हात झिकेकी छिन् । उनलाई रिप्लेस गर्दै बर्षा राउत भित्रिएकी छिन् । कुरा यहाँसम्म मात्र रहेन, अभिनेता खगेन्द्र लामिछाने समेत बाहिरिएपछि बिपिन कार्की भित्रिएका छन् । अब भने निर्माण टिमले बर्षा राउत, सुरक्षा पन्त र बिपिन कार्की फाइनल लिड कलाकार बताएको छ ।
मंगलबार राजधानीमा प्रेस भेटघाट गरेर निर्माण टिमले ‘कास्टिङ लाइनअप’ परिवर्तनको बारेमा जानकारी गरायो । जहाँ अभिनेत्री सुरक्षाले हालै बाहिरिएकी बर्षा शिवाकोटीलाई इङ्गित गर्दै घुमाउरो पाराले अव्यवसायिक अभिनेत्रीको ट्याग दिइन् । ‘हामी दुबैले वानलाइन स्कृप्टमा अनुबन्धता जनाएका हौँ, पुर्ण स्कृप्ट सबैले पछि नै पढिएको हो, सुरक्षाले भनिन्, ‘पुर्ण स्कृप्ट पढिसकेकी चित्त नबुझ्दा तर्कसङ्गत रुपमा स्कृप्ट परिवर्तन गर्न लगाउन सकिएन भने, अथवा स्कृप्टमा राम्रोसँग बस्न सकिएन भने त्यसमा आरोप लगाएर काम छैन ।’
बर्षालाई सटाएर सहित सुरक्षाले यस्तो प्रकारको कार्यले कोहिसँग पनि ‘हेल्दी रिलेशन’ बन्न नसक्ने तर्क गरिन् । यो नबोल्दै उनले शिवाकोटी भन्दा बर्षा राउत नै आफुलाई पहिलेदेखि मन पर्ने अभिनेत्री दाबी गरिसकेकी थिइन् । मुख्य भनिएका दुबै कलाकारको ठाउँमा नयाँ आउँदा तपाइँ त बाहिरिने संभावना छैन नि भन्ने प्रश्नमा सुरक्षाले हाँस्दै भनिन्, ‘मेरो पात्रको लागी दिइएको जिम्मेवारीमा तल माथी छैन र म बाहिरिने पनि छैन, कथा र पात्र चरित्रलाई न्याय गर्नमा दिनरात तल्लिन छु ।’
दिपेन्द्र लामाको निर्देशनमा बन्ने गोपीमा समिप्यराज तिमिल्सिनाको स्कृप्ट समावेश छ । कार्यकारी निर्मातामा श्रीधर पौडेल छन् । फिल्म भदौ ३ गतेबाट फ्लोरमा जाँदैछ ।
