‘दि ब्रेकअप’ इण्डक्ल्याप, अफिसियल रिलिज घोषणा
फिल्म ‘दि ब्रेकअप’को सम्पुर्ण छायांकन सकिएको छ । नेपालको पोखरा तथा अष्ट्रेलियाका विभिन्न शहरहरुमा फिल्मका दृश्यहरु कैद गरिएका छन् । निर्माण टिमले सोमबार राजधानीमा ‘इण्डक्ल्याप पार्टी’ आयोजना गरि फिल्मको सम्पुर्ण छायांकन सकिएको जानकारी गरायो सँगै अफिसियल प्रदर्शन मिति समेत घोषणा गरियो ।
फिल्म आगामी पौष २७ बाट दर्शकमाझ आउने भएको छ । यसअघि भदौ १५ लाई फिल्मको रिलिज मिति बताइएको थियो । प्राविधिक कारणबस फिल्मको छायांकन मै ढिलाई भएपछि प्रदर्शन मिति नयाँ तोकिएको निर्देशक हेमराज बिसीले बताए ।
अष्ट्रेलिया छायांकनको समयलाई स्मरण गर्दै निर्देशक बिसीले विदेशमा नेपाली छायांकन गर्नु चुनौतीपुर्ण रहेको बताए । ‘लुकिछिपी खिच्ने, विदेश खिचेको मात्रै चर्चा गर्नलाई हो भने केहि नहोला, तर अनुमती लिएर पुर्ण व्यवस्थापन सहित फिल्म छायांकन गरेर फर्किन निकै गार्हो छ’, उनले सुनाए ।
अभिनेता आशिरमान देशराज जोशीले एउटा राम्रो टिमसँग काम गर्न पाएको तथा कथा सुहाउँदो दृश्यांकनमा निर्माण टिमले कन्जुस्याइँ नगरेको भन्दै निकै सहजताका साथ फिल्म सकाएको बताए । अभिनेत्री द्वय शिल्पा मास्के र इच्छा कार्की फिल्मलाई लिएर आशावादी छन् । सरोज खनाल र रेमनदास श्रेष्ठ पनि फिल्मका लिड कलाकार हुन् ।
निर्माण घोषणा गर्दाको समयको मुख्य ब्यानर रोहित अधिकारी फिल्मस् हालै ‘दि ब्रेकअप’बाट बाहिरिएपछि अब फिल्म बिसी मोशन पिक्चर्स र हेप्पी प्लानेट फिल्मस् को ब्यानरमा तयार हुनेछ । निर्देशक बिसीसँगै रुपक थापा, दिपक खतिवडा, रेनु राणाले लगानीमा साझेदारी गरेका छन् ।
