यौन मनोविज्ञानको कथा बोल्ने ‘मिस्टर भर्जिन’ ट्रेलर रीलिज
फिल्म ‘मिस्टर भर्जिन’को ट्रेलर रीलिज भएको छ । आउँदो भदौ १ गते रिलिज मिति तय गरिएको फिल्मको आइतबार राजधानीको क्यूज सिनेमा हलमा आयोजित एक कार्यक्रमका बीच ट्रेलर रिलिज गरियो ।
तीन युवाको यौन मनोविज्ञानको कथा बोल्ने फिल्मको ट्रेलरलाई कमेडी बनाइएको छ । निर्देशक विशारत बस्नेतले नियमित फिल्म हेर्ने ५० प्रतिशत युवापुस्ताले आफ्नो फिल्म हेर्ने विश्वास पोखे । वर्ल्डवाइड डिष्ट्रिव्यूसन प्रालीको ब्यानरमा फिल्म निर्माण भएको हो ।
फिल्ममा गौरव पहारी, विजय बराल, कमलमणि नेपाल, मरिश्का पोख्रेल, भोलाराज सापकोटा, रविन्द्र झा, सिर्जना सुब्बा लगायतका कलाकारको अभिनय रहेको छ ।
कार्यक्रममा मुख्य कलाकारहरुले भरपुर मनोरञ्जनको प्याकेजको रुपमा ‘मिस्टर भर्जिन’ रहेको दाबी गरे । अभिनेत्री मरिश्काले राम्रो स्कृप्ट अनि राम्रो टिमको कारण प्रोडक्ट पनि राम्रो निस्केको भन्दै दर्शकको साथको अपेक्षा राखिन् । फिल्मलाई रामेश्वर कार्कीले खिचेका हुन् ।
