तमाशा देखाउन छुल्ठिमलाई चाहियो पैसा !
फिल्म ‘मिस्टर भर्जिन’को दोश्रो गीत सार्वजनिक गरिएको छ । शुक्रबार निर्माण टिमले ‘पैसा फेक तमाशा देख’ बोलको आइटम गीत सार्वजनिक गर्यो । गीतमा ‘डल्ली’ उर्फ अभिनेत्री छुल्ठिम गुरुङ मुख्यतः फिचर छिन् ।
छुल्ठिमका साथमा अभिनेता गौरव पहारी, कमलमणि नेपाल र बिजय बरालले पनि गीतमा कम्मर भाँचेका छन् । शशि रावल र राजेन्द्र भट्ट (मिस्टर आर. जे.)को आवाज रहेको गीतमा संगीत पनि गायक स्वयंमको छ । दिपक याम सिंहको नृत्य निर्देशन छ ।
विशारद बस्नेत निर्देशित ‘मिस्टर भर्जिन’ यही भाद्र १ गतेबाट प्रर्दशनमा आउने तयारीमा रहेको छ । फिल्ममा गौरव पहारी, विजय बराल, कमलमणि नेपाल, मरिश्का पोख्रेल, भोलाराज सापकोटा, रविन्द्र झा, सिर्जना सुब्बा लगायतका कलाकारको अभिनय रहेको छ ।
फिल्मको कथा तथा पटकथा लेखनमा विजय थापा, अजय पन्त, सन्तोष बोहोरा, हिरा लामा, कपिल खड्का, स्नेहा पौडेल, विशारत बस्नेत र महेश दवाडीको जम्बो टोलीले साझेदारी गरेको छ भने संवाद महेश दवाडीले लेखेका छन् ।
‘मिस्टर भर्जिन’लाई रामेश्वर कार्कीले खिचेका हुन् भने विक्रम स्वाँर र दीपक याम सिंहले कोरियोग्राफी गरेका छन् । सुरज पण्डित, श्रीकृष्ण बम मल्ल, आधा सुर, मिस्टर आर.जेको सङ्गीत समावेश छ ।
वोर्ल्ड वाइड फिल्म्स डिस्ट्रिव्यूसन प्रा.लीको ब्यानरमा निर्माण भएको ‘मिस्टर भर्जिन’मा खिलेन्द्र तिमल्सिना, प्रजापति सिवाकोटी, मुकेश रेग्मी र बिशारद बस्नेतको लगानी रहेको छ भने सह निर्मातामा सन्दिप उप्रेती छन् ।
