‘बोबी’ गीत रिलिजः रोमान्टिक मूडमा कविता र उमेश (भिडियो)
फिल्म ‘बोबी’ले यतिबेला प्रचार प्रसारलाई आक्रामक बनाउँदै छ । असार २९ लाई तय गरिएको प्रदर्शन मिति नजिकिँदै गर्दा निर्माण टिम कलाकार सहित देश दौडाहमा छ । यो बीचमा मंगलबार मात्रै फिल्मको एक गीत रिलिज गरिएको छ ।
मुख्य कलाकार रहेका उमेश थापा र कविता गुरुङ फिचरिङ रोमान्टिक गीतलाई नर्वेका विभिन्न रमणीय स्थानमा खिचिएको छ । कविता र उमेशकै रियल कथामा फिल्म तयार भएको हो । मिलन चाम्सले फिल्मलाई निर्देशन गरेका छन् ।
ताराप्रकाश लिम्बुको शब्द/संगीत रहेको ‘अरे सुन…’ गीतमा प्रविशा अधिकारी र संगीतकार स्वयमको स्वर छ । नवराज कृष्ण थापाले खिचेको गीतमा कविराज गहतराजको कोरियोग्राफी र बनिश शाहको सम्पादन छ ।
संचारकर्मी नरेश भट्टराई र गिरिराज घिमिरेको स्क्रिप्टमा बनेको फिल्ममा विजय लामा, रुबी राणा शाह, देशभक्त खनाल, रश्मि भट्ट, रवि गिरी, सुरवीर पण्डित, बादल भट्ट, पुर्णिमा लामा, शिशिर राणा लगायतका कलाकारहरुलाई अभिनयमा देख्न सकिन्छ ।
