पैसा लफडामा रोकियो ‘रानीमहल’, २५ प्रतिशत खिच्दा डेढ करोड झ्वाम !
पुर्व मिस नेपाल निकिता चण्डकले डेब्यू गर्न लागेको फिल्म ‘रानीमहल’ छायांकनमै लफडामा परेको छ । फिल्मको सुटिङ रोकिएको छ । पाल्पाको रानीमहलमा खिच्दै गर्दा फाइनान्सियल लफडा सुरु भएपछि अनिश्चितकालिन सुटिङ पोष्टपोण्ड सहित फिल्म टिम काठमाडौं फर्केको छ ।
फिल्मको हालसम्म २५ प्रतिशत मात्रै छायांकन सकिएको निर्माण टिमका एक सदस्यले बताए । २५ प्रतिशत छायांकनमा निर्देशकले ३७ दिन लगाएका छन् । निर्देशक हिमाल न्यौपाानेले यो कुरा घुमाउरो पाराले स्विकार गरे । सामान्यतः ३७ दिन भनेको नेपाली फिल्मको ‘अलमस्ट’ सबै छायांकन सकिने समय हो ।
तर अपत्यारिलो कुरा फिल्म निर्माण घोषणाको समयमा मिडियामाझ बोलिएको डेढ करोड बराबरको बजेट २५ प्रतिशत छायांकनको समयमा नै सकिएपछि निर्माण टिममा लफडा सुरु भएको हो ।
निर्माता (वेदप्रसाद) विमल भुषाल निकट श्रोतका अनुसार हालसम्म १ करोड ६० लाख रुपैयाँ ‘रानीमहल’ सेटमा खर्च भइसकेको छ । भुषालले निर्देशक न्यौपानेले अनावश्यक रुपमा पैसा सकाएको भन्दै अब फिल्मको बाँकी काम आफुले अघि बढाउन नसक्ने बोलेका छन् । निर्माताको यो कुरा सुन्दै गर्दा फिल्मको अबको छायांकन अनिश्चित बनेको छ ।
निर्देशक न्यौपाने र प्रोडक्सन हेड गणेश सापकोटाको मिलेमतोमा अनावश्यक रुपमा निर्माताको पैसा हिनामिना भएको आरोप लगाइएको छ । एक प्राविधिकले नाम नबताउने सर्तमा बताए । त्यसो त फिल्मको सुटिङ सेटमा नै प्राविधिकहरुले पारिश्रमिकको विषय उठाएर हड्ताल समेत गरेका थिए ।
केहि प्राविधिकलाई पारिश्रमिक स्वरुप चेक प्रदान गरिएको र वाउन्सको क्रममा रहेको भन्दै उनिहरुले न्यायको लागी कानुनी बाटो रोज्ने समेत तयारी गरेका छन् । प्राविधिकहरुले खोजी गर्दा निर्माता निर्देशक सम्पर्कमा समेत नआएको बताइएको छ ।
उता निर्देशन न्यौपानेले मौसमी गडबडीको कारण फिल्मको छायांकन रोकिएको दाबी गरे । रकम हिनामिनाको प्रसङ्गमा उनले निर्माता भुषालको नाम सम्म लिन चाहेनन्, जुन कुराले पनि उनिहरुबीचको बिमती छर्लङ्ग बनाएको छ । न्यौपानेले कथाको माग अनुसारको दृश्य खिच्दै गर्दा सोहि प्रकारको खर्च भएको दाबी गरे ।
त्यसो त फिल्मको घोषणापछि सुरुवातमा मुख्य कलाकार भनिएका वर्षा शिवाकोटी, प्रशान्त ताम्राकार लगायतले साइनिङ अमाउण्ट नै फिर्ता गरेर हात झिकेपछि यसअघि नै यो फिल्म विवादमा आएको थियो । त्यसपछि मात्रै वर्षाको स्थानमा निकिताको इण्ट्रि भएको थियो । यो फिल्ममा लिड अभिनयमा निकितासँग नव अभिनेता प्रितमराज सेञ्चुरी छन् ।
